إدمان الخطأ
السلام عليكم، الكلام اللي رح قولو صعب علي كتير بس هي الحقيقة، انا بنت وحيدة على ثلاثة إخوة شباب، والصغيرة بينهم، نحنا عائلة محافظة وأمي وأبي جامعيين، أخواتي واحد بس دارس جامعة وأنا عم أدرس وبدي كمل جامعة. من وقت كنت طفلة صغيرة يعني سبع سنين تقريبا كنت بفكر بالحب وبتخيل كتير وكنت بمارس العادة السرية بس مابعرف إنها عادة لوقت شفت هون عالموقع وعرفت وتركتها لفترة طويلة بس رجعتلها من سنة تقريبا.
لما كان عمري 14 تعرفت على صديقة بالمدرسة كانت تحب ابن جيرانها وتحكيلي كتير عنه، وبعدين صارت تدقلو وتحاكيه ومرة طلبت مني أحكي معو كرمالها وقلو إنو هي مريضة وهي معجبة فيه، وماعم تقدر تدرس كرمالو وأنا وافقت، ومن هون بلش الغلط، وصارت عندي عادة وصرت أحكي مع شباب ...بهي الفترة كانت أمي مسافرة صار عنا ظرف بالبيت واضطرت تسافر كانت تجي بالسنة شهرين...
حبيت شاب بعمر الـ 15 من بلدي وضليت حبو تلات سنين وقامت الثورة بسورية وأنا حبيتو بزيادة وتعلقت فيه كتير وبدينا ننزح من مكان لمكان إخواتي وأبي كانو بالثورة مشتركين وأمي مسافرة برا سورية، لهيك أنا كنت اضطر أترك البيت وأسكن مع بيت خالي عندهن بنتين من عمري بحبن كتير وبحبوني كنت مرتاحة عندن بس دايما كان ناقصني كتير ومع هالظروف تعلقت بالشاب أكتر وصار هو كل شيء بالنسبة إلي، بعد فترة طلب صورتي وأصر عليها وأنا رفضت بشدة وتخانقنا وتركتو ....بلش عالم النت ينتشر بسورية وبديت استخدمو وطبعا استخدام خاطئ...
تعرفت على شاب عالنت كنا أصدقاء لفترة طويلة قريب السنة بعدها قلي بحبك قلتلو وأنا كمان، وصرنا نحكي كل يوم بس هو غيرني كتير للأسوأ، طبعا كان يحكي معي كلام جنس عالتلفون، وأنا مابعرف كيف كنت أقبل، بعد فترة اشتدت الحرب بسورية كتير، واستششهد أخي اللي دارس، نزحنا على تركيا وسكنا ببيت بقلب تركيا بعد فترة قصيرة عرفو أهلي بقصة الشاب التاني، وحكى مع أمي وحاول يطلبني بس أمي رفضت كتير ومنعوني عن النت لفترة شهر، بس ماتربيت ورجعت أحكي معو وأصريت على غلطي، بعدين شفتو هون بتركيا أول مرة كان لقاء حلو لأول مرة بشوفو وبشوفني بعد سنتين عالنت والتلفون.
ورجعنا التقينا مرة تانية بس المرة التانية كانت القاضية كنا ماشيين بالشارع وكنت خايفة حدا يشوفنا، فكان في بناية دخلنا عليها وصار بينا شي غلط ضمني وقبلني وبعتذر عالتعبير الكلام صعب كتير بس أنا كتير تعبانة، بعد فترة كرهتو وقرفت منو بسبب هالقصة ولأنو هو غيرني كتير وتركتو، وتبت وبكيت وندمت حاولت أتغير كتير وقلت خلص ماعاد بحكي مع حدا بكفي لهون وبس، بعدين رحعت أتسلى عالفيس بس كان دردشة ما فيها شي، اتعرفت ع شاب كان صديقي ولهلق صديقي هو إنسان رائع وشهم وطيب هو حبني بس أنا لاء وفهمتو هالشي ولهلق منحكي عالنت أصدقاء كتير بعزو بحترمو، هي تفاصيل حياتي باختصار، يلي عم يدبحني إني ندمانة وبدي أتغير بدي أتغير بس بحس شو مادعيت وشو ماعملت مو مقبول مني لأني غلطت كتير وكل ماقلت بدي أتغير برجع بغلط لحتى أدمنت الغلط.
ساعدوني، أنا بحتقر نفسي كتير بعد كل هالوجع يلي دقناه بسورية وبعد موت أخي وأنا ماتغيرت، لساتني تافهة ولسا صرت أحقر كمان، أنا بخجل لما بطلع بعيون أمي. صحيح نسيت أكتب إنو بعد ما إجينا ع تركيا إجت أمي وعاشت معنا..... كل ما اتذكر الماضي بموت وبخاف كتير بخاف من الله وبخاف ينحكا شي لأهلي، بخاف من بكرة ..من الناس، وبخاف من حالي، كيف بدي أرجع أثق بنفسي واقدر أرفع راسي، كيف بدي حس إنو ربنا قبل توبتي، كيف بدي انسى ماضيي، إذا تزوجت وسألني زوجي عن ماضيي شو بدي قلو؟؟
05/12/2014
وفي رسالة منفصلة أرسلت تقول:
إدمان الخطأ2
أنا صاحبة مشكلة إدمان الخطأ نسيت أكتب بالرسالة الماضية
أرجوكم لا تعرضوا الاستشارة عالموقع
ممكن تردون على عالايميل إذا سمحتوا
ما بدي حدا يقرا شيء رجااااء
05/12/2014
ثم مرة أخرى بعد 4 أيام أرسلت تقول:
أين استشارتي؟؟
مرحبا، كتبت لكم استشارة بعنوان إدمان الخطأ
ولم يتم الرد عليها وأعذركم بسبب ضيق وقتكم لكن عندما أفتح الملف الشخصي كنت أجدها واليوم لم أجد استشارتي في ملفي فهل يوجد خطا ما أم تم الرد عليها لذلك أزيلت ؟؟!!
وإذا ما تم الرد عليها كيف سأعرف وأين أجدها بحثت بالمشكلات لم أجدها؟؟
أرجو المساعدة
شكرا
09/12/2014
رد المستشار
الأخت العزيزة "ماسا"
عظم الله لك الأجر بمصابك بأخيك ورحمه ورحمك برحمته الواسعة.
بالنسبة لمشكلتك أنت تفكرين بأن الله هل سوف يسامحك وووو..هل هذا يعني أنكِ تركتِ هذه التصرفات؟
إذا تركتها وحاولتِ أن تكفري عن ذنوبك بالتقرب إلى الله عن طريق الالتزام بالواجبات وهجر المحرمات واستغفرتِ من ذنوبك والتزمتِ بعدم الرجوع إليها، ثقي أن الله سبحانه سوف يغفر لكِ فهذا وعدٌ منه وحاشاه أن يخلف وعده.
اطلبي من الله المغفرة والستر وأن لا ينفضح أمرك واستعيني به.
أما إذا تزوجتِ فلا داعي لذكر هذه الأمور لزوجك، ولا تذكري له وتؤكدين أنك أبداً لم تتحدثي مع أي شاب حتى لا تكوني كاذبة.
لابد أن تغيري من نمط حياتكِ تماماً كي لا تتورطي بهذه المشاكل، شاركي في أعمال تطوعية وانضمي إلى مجموعات ثقافية وأكثري من قراءة الكتب المفيدة حتى تشغلي وقتك وعقلك بأمور مفيدة تغنيكِ عما أدمنتي عليه. وفقك الله وأعانك.
واقرئي أيضًا:
التائب من الذنب كمن لا ذنب له
التائب التائة ماذا يفعل؟
التوبة وكيف أسامح نفسي ؟
بعد الذنب التوبة، هل بعد التوبة ذنب؟
التعليق: السوال الذي يظرح نفسه لماذا كتبت الآنسة للموقع؟.
لا شك أنها في حالة ضياع: فقدت الأخ والوطن والأصدقاء . الإنسان الضائع يبحث عن طريق وعندما لا يجده يسأل الآخرين.
لكن مشكلتها أيضاً لا تختلف عن مشاكل الكثير من المراهقين والتي قد نسميها عبث ولكنها حزء لا يتجزآ من تجارب في الحياة يتجاوزها الإنسان قرب تجاوزه مرحلة المراهقة وينتقل إلى مرحلة أخرى في الحياة يدرك فيها بأنه لا يمكن فصل المسوؤلية والحرية.
امضي في حياتك ولو لم تكوني قادرة على الانتقال من الماضي إلى المستقبل لما راسلت الموقع .
وفقك الله.