دكتور وائل أبو هندي،
السلام عليكم، عمري 17 عاما في الصف الثاني الثانوي، حياتي كويسة ومعنديش مشاكل كبيرة وأهلي كويسين جدا ودايما عايزيني أبقي أحسن واحدة في الدنيا وأنهم يشوفوني دائما فرحانة. ومستوانا فوق المتوسط والحمدلله، وناس كتير بتحبني، ذكية ومستوايا كويس في الدراسة، وأصلي من وأنا في تانية ابتدائي ومفيش مرة بسيب صلاة لأني اتعودت أصلي من زمان، ولكن رغم كل النعم اللي ربنا مديها لي ديه إلا إني جاءت فترة فقدت ثقتي في نفسي وبقيت دائما أحس أني أقل من الناس وفي فترة جاء لي وسواس في الوضوء وعدد الركعات فكنت أعيد وضوئي وصلاتي كثيرا ولكن الموضوع ده اختفى؛
بعد كدا وأنا في أولى إعدادي ابتدت تظهر علي حالة غريبة وهي أني أشد في شعر رأسي وواحدة واحدة لقيته شيء مش عارفة أبطله، كأني شخصين في واحد، شخص كاره الحالة ديه وعايز يتخلص منها وفي نفس الوقت شخص بيحب الحالة ديه ومش قادر يبطلها، وكان بيوصل معايا الموضوع إلى أني أبقى بعيط وبرده مش قادرة، اتغلبت على موضوع أني مبقاش واثقة في نفسي وبقيت أقول ربنا خلقنا كلنا لسبب وكلنا بني آدميين ومفيش فرق بيني وبين أحد وأن أنا مش أقل من أحد، بقيت مبسوطة إني قدرت لوحدي أعمل كدا ولحد دلوقتي دائما أحاول أقوي شخصيتي.
السنة اللي فاتت قررت أروح لدكتور رغم إن ماما وبابا كانوا معارضين الموضوع ودايما يقولون لي "هو إنتي مجنونة ولا حاجة علشان تروحي لدكتور نفساني؟" وأمي كانت شايفة إن أي دكتور هايديني دواء بعد كده هادمنه وهايخليني دايما نايمة، وبابا كان بيقولي "علشان خاطري متعمليش الحركة ديه تاني لو بتحبينا" محدش فيهم قادر يفهم إنها بجد مش بإيدي،
وفعلا رحت لدكتور وأول مرة كانت عبارة عن عشر دقايق قال لي مالك، عندي كذا، طيب بسبب التوتر؟ قلت له لأ حركة مش قادرة أبطلها، قال لي طيب الموضوع سهل وهاتخفي هاتخفي متقلاقيش، وقام كاتب لي على دوائين كدا منهم واحد اسمه فافرين والتاني مش فاكرة اسمه وبعدين قال لي آجي بعد أسبوعين ولما رحت له قالي مفيش تحسن شوية قولتله لا، قام زود الجرعة وقال لي تعالي لي بعد أسبوعين، بصراحة مرتحتلوش
فقررت أروح لدكتور تاني سمعت أنه شاطر أوي ورحت حجزت وكان في كشوفات كتيرة أوي معظمهم حالات عندهم حاجات صعبة زي الضمور والصرع والحاجات اللي تبع الأعصاب ديه، وطبعا أنا أول ما دخلت له قال لي خير بتشتكي من إيه قلت له أنا بشد في شعر رأسي غصب عني وعايزة حل، قام بص لي كدا وكأنه عايز يقولي إيه التفاهة ديه، وقام قال لي "بسيطة، البسي جوانتي" قلت له نعم؟ ألبس جوانتي؟ أنا جربت قبل كدا أربط شعري بس منفعش قال: "وأنا معنديش ليك حل غير كدا، عارفة المريض اللي بيعضعض في صوابعه بعمله إيه؟ بربطله إيديه وراء ظهره "قلت له طب العلاج الدوائي؟ قال لي وهو في دواء هايخليكي متشديش شعرك وضحك، قلت له لا بس أكيد هايساعد قال لي خلاص هاكتبلك دوا زي ما تحبي، وقام كاتب لي دواء أخدت الروشتة وقلت سلام عليكم ومشيت، وطبعا ولا أخدت الدواء اللي كتبه ولا رحتله تاني وزيارتي للدكتور ده كانت من أسبوعين.
الدكاترة اللي رحت لهم ماخلونيش أفقد أمل أني أبطل الحالة ديه ولو 1% بالعكس أنا عارفة إن العيب منهم وعارفة أني هاخف بإرادتي وأن مفيش دكتور ساحر هايخففني بس أنا كل اللي محتاجاه استشارة دكتور يساعدني ويقول لي أعمل إيه ومع إرادتي ومساعدة الدكتور بعد مساعدة ربنا والعلاج السلوكي والدوائي أنا واثقة أني هاخف.
دكتور وائل أبو هندي، أنا قرأت الكلام اللي كنت كاتبه عن الحالة ديه وعاجبنبي جدا وحسيت فعلا أنك فاهم وعارف إن الموضوع مش سهل أوي، أنا هاجي لحضرتك العيادة قريب إن شاء الله وطالبة إنك ترد عليّ وحابة أشوف تعليقك على الكلام اللي كتبته ويا ليت لو تقول لي لما آجي لحضرتك العيادة هاتكون طريقة العلاج إزاي وهل هاتنتهي الحالة ديه في وقت كبير ولا لا
مع العلم إني داخلة على ثانوية عامة والحالة ديه بتأثر على تركيزي لأني بسيب المذاكرة وأمسك شعري ،،، آسفة على الإطالة وأرجو منك الرد.
04/02/2015
رد المستشار
الابنة الفاضلة أهلا وسهلا بك على مجانين وشكرا على الثقة، إذن هي قصة جديدة من قصص عذابات مريضات اضطراب شد الشعر Hair Pulling Disorder أو ما تسمى طويلا باضطراب نتف الشعر أو هوس نتف الشعر Trichotillomania... في المرة الأولى وقعت في براثن أحد الزملاء من النوع الشائع وهو: طبيب نفسي كيميائي فلم يكن لديه إلا الدواء والوعد بالدواء... وفي المرة الثانية وقعت في براثن أحد الزملاء أيضًا لكنه لم يكن طبيبا نفسيا وإنما طبيب أو على الأغلب أحد جراحي المخ والأعصاب..... من المؤسف كانت طرقهما في التصرف معك وما أظهراه لك من انطباعات نمت عن تقصير في حقك من الزميل الأول لأنه لم يرشدك إلى العلاج المعرفي السلوكي وحاول الإيحاء بأن عقاقيره ستحل المشكلة وأما الثاني فعبر عن عدم دراية بطبيعة الأعراض، وهو ما يعني التصدي لعلاج حالة دون دراية بأعراضها ولا بمشاعر المريض بها ولا أفكاره... لذلك جاءت تعليقاته على كلامك كأنها ردود رجل عادي لا طبيب.
مثالية حالتك في بيان العلاقة بين الاندفاعية والقهرية في سلوك نزع الشعر وهي علاقة قديمة جعلت النظرة حتى إلى تصنيف نوعية هذا الاضطراب تتأرجح بين اضطرابات العادات والنزوات أو التحكم في الاندفاعة وبين الوسواس القهري واستقرت أقرب إلى اضطراب الوسواس القهري حسب آخر التصنيفات... وهذه النقطة ستنفعنا لاحقا في العلاج... خاصة وأنك مررت في الطفولة بمرحلة ظهرت فيها أعراض الوسواس القهري بشكلها الشائع.
رد فعل أسرتك يبدو كالمعتاد بل أصدقك القول أنه أفضل كثيرا من المعتاد فهناك من يرفضون تماما علاج بناتهم عند طبيب نفساني وهناك من يصرون على عدم استخدام العقاقير بأي حال... وأرى والديك متسامحين بالمقارنة،...... تحتاجين إلى قراءة بعض مقالاتنا القديمة عن الموضوع :
اضطراب نتف الشعر Trichollomania مقدمة:
اضطراب نتف الشعر العلية (Trichotillomania Etiology)
نتف الشعر غير الوسواسي !
نطاق الوسواس OCDSD نتف الشعر Trichotillomania
نتف الشعر: العلاج مقدمة (Trichollomania Treatment)
لا أستطيع التكهن حقيقة بكم الوقت أو عدد الجلسات التي قد تحتاجينها لعلاج حالتك ببساطة لأن هذا الأمر ليس ممكنا قبل التقييم الكامل للحالة، ولكن ما يمكن الوعد به هو أنك إن وفقت في التعاون مع معالجك فسيكون المرور بمرحلة الثانوية العامة إن شاء الله أيسر وأكثر سلاسة.... أهلا بك.