المتأثرة بالعوامل الخارجية..!؟
السلام عليكم، أنا طالبة بالفرقة الأولى كلية الطب جامعة الإسكندرية، طول عمري كنت متفوقة في دراستي ومثال للأخلاق والاحترام، وكانت أمنية أهلي أن أدخل كلية الطب، أما بالنسبة لي كانت ميولي مختلفة تمامًا، كنت عاوزة أدخل كلية الإعلام، لكن لما جبت مجموع يؤهلني لكلية الطب، ردخت لرغبة أهلي اللي تعبوا كتير علشاني، ولما دخلت الكلية، كنت حاطة هدف إني لازم أرتب علي الدفعة، وأبقي معيدة، وكنت عارفة إن ده مش سهل، وإن اللي هيصعبه أكتر إني مش حابة الكلية، وإني مش من الإسكندرية، وبالتالي سكنت في شقة مع بنات زمايلي من نفس الكلية، وابتدت المعاناة.
بدأت الدراسة وبدأنا كلنا بنية إننا ندح زي ما بيقولوا، لكن أنا طريقة مذاكرتي صعبة، بمعني إني لازم وأنا بذاكر المعلومات لأول مرة، لازم أركز عليها قوي، ودا كان بياخد مني وقتًا طويلا جدًا، يعني ممكن أخد في المحاضرة الواحدة 4 ساعات، ودا كان بيعقدني جدًا، ومع الكميات الرهيبة ازداد الأمر سوءًا، وبقيت أنا بتأخر والبنات اللي معايا بيتقدموا، ودا سبب لي حالة نفسية وحشة جدًا، مبقتش بضحك، ولا بهزر، وعلي طول بعيط لحد ما امتحنا midterm؛
وظهرت النتيجة وكنت أنا أقل من زمايلي اللي ساكنين معايا، وقتها اتعقدت أكتر، وقررت إني أغير السكن فسكنت في بيت طالبات مع واحدة زميلتي هيه على خلق، لكن للأسف هي نفس حالتي وأسوأ، وبدل ما نساعد بعض شدينا بعض للهلاك، صحيح عملنا خطط كتير ننقذ نفسنا، بيها بس متنفذتش، ودخلنا امتحانات الترم الأول، وبعدها ظهرت النتيجة، وسقطت في الترم الأول كله، وشلت المديولين؛ لأن نظام كليتنا غير أي كلية، ودا سبب لي اكتئاب.
حاولت أخرج كتير من اللي أنا فيه، وأبدأ من الأول في الترم التاني، وأغير عادات عندي لكن كل محاولاتي فشلت، مع العلم أن أهلي وقفوا بجانبي، وكانوا دايمًا بيشجعونني ومقصروش معايا، إلا أني فقدت الثقة في نفسي، ومش عارفة أنا عاوزة إية؟! ولا حتي أنا مين واللي بيزود عليه كدا، إن البنات اللي كانوا معايا من الأوائل على الدفعة، مش عارفة هل أنا مش قد الطب ولا أنا اللي مش واثقة في نفسي؟
كفاية نفسي أفرح أهلي، لكن حاسة إن في حاجة مكتفاني، مش مخلياني قادرة أعمل حاجة، وكل شوية تطلعي حاجة تعقدني أكتر، وتهبطني مع العلم إني بتأثر جدًا بالعوامل الخارجية، ومبقدرش أفصل بين المذاكرة وأي حاجة تانية...
أرجو الرد
وشكرًا
12/6/2015
رد المستشار
عزيزتي "كوثر": ألف مبروك قبولك في الجامعة، وأهنئك على مجهودك، وسعيك لتحقيق النجاح.
عدم حصولك على درجات جيدة ربما يكون لسببين:
١- النجاح في مجال الطب يحتاج إلى ذاكرة، ودقة قوية جدًا، وأعلى من المستوى المتوسط، وربما ذاكرتك في المستوى المتوسط؛ ولذلك لم تحققي النجاح المطلوب وفي هذه الحالة الأفضل لك أن تحولي إلى تخصص أسهل.
٢- ربما يكون القلق الزائد، وخوفك من عدم تحقيق النجاح المتوقع، هو السبب في فقدان التركيز، وعدم حصولك على درجات جيدة، وإذا كان الموضوع كذلك يجب أن تعالجي القلق، وتتخلصي من الخوف الزائد من الفشل.
إذاً للحصول على العلاج يجب أن نشخص السبب، وحينها يكون العلاج أسهل.
أتمنى لك التوفيق والنجاح.
ويضيف د. وائل أبو هندي الابنة الفاضلة أهلا وسهلا بك على مجانين ليست إضافة بعد ما تفضلت به مجيبتك أ. زهراء الموسوي إلا أن أحيلك إلى بعض الصفحات التي تفيدك ربما في تصحيح طريقة المذاكرة وعليك في نفس الوقت تنفيذ ما نصحتك به مجيبتك،
فاقرئي على مجانين:
المذاكرة بعد الثانوية العامة
كيف أقوي تركيزي وذاكرتي؟؟
منى والمذاكرة قبل الامتحانات
كيف أذاكر موادا كثيرة؟ مشاركة