اضطرابات نفسية شديدة...
السلام عليكم ورحمة الله وبركاته ،الرسالة طويلة شوي، أنا آسف..
أنا عندي 25 سنة، حديث التخرج، بعاني من اضطرابات نفسية شديدة من وأنا صغير..
أنا عندي تشوه في وشي وبعض الأطفال كانوا بيفضلوا يتريقوا علي وأنا صغير.. لما كبرت التشوه هذا اختفى بنسبة كبيرة بس لسه موجود.. التشوه هذا ممكن يكون من الحاجات اللي أثرت علي بشكل كبير؟ مش عارف..
- طول عمري كنت خجول مع الناس اللي مش متعود عليهم بس وأنا صغير كان عندي صحاب كثير وكنت بخرج على طول.. مع بداية فترة المراهقة بدأت أقضي معظم وقتي على الكمبيوتر وبدأت أبعد عن صاحباتي واحدة واحدة.. أدمنت ألعاب الكمبيوتر وبدأت أتعرف على العادة السرية وأدمنتها
-مع بداية فترة الثانوية، ما كنت بهتم بنفسي خالص وظهر حب شباب في وشي وبقيت خجول بدرجة كبيرة جداً.. كان لسه عندي صحاب بس قليلين.. ما كنت بذاكر خالص، معظم وقتي على الكمبيوتر
-في الجامعة الوضع ما تحسنت.. ما كنت بعرف أتكلم مع حد وصحابي كانوا قليلين، في بعض الأحيان الناس كانوا الناس يدخلوا يسلموا على بعض ويجوا عندي وما يسلموا عشان عارفني إني مش بكلم حد.. الموقف هذا كان يقتلني بس كنت أبقى عارف إني السبب..... مستواي الدراسي كان ضعيف جداً جداً فاضطررت أحول لجامعة ثانية، كنت لسه خجول برده بس كنت حاسسها فرصة جديدة وبقى عندي أمل إني أبقى شخص طبيعي.. مستواي الدراسي أتحسن بشكل كبير وبقيت من الأوائل وبدأت أكون صداقات.. بعد فترة، الأمل ابتدئ يختفي ثاني وجالي اكتئاب شديد، بس كنت أحاول أحافظ على مستواي الدراسي عشان التقدير العام.. شخصيتي كانت ضعيفة وفي ناس كانوا يستغلوني عشان أساعدهم.. مع الوقت شخصيتي بدأت تبقى أقوى وبدأت أرفض أساعد لو هيبقى في ضرر لي، وبقيت بأكره معظم الناس اللي كانوا يستغلوني
-رحت لدكتور نفسي وأنا في الجامعة، تكلمت معه وحكيت له (بعض) المشاكل النفسية اللي عندي.. قالي آخذ أدوية مش فاكر اسمها، وقعد يكلمني بس كلامه ما عجبني فقررت أنه مش هروحله ثاني.. بس قالي حاجة مهمة، إني بسعى للكمال وهذا مآثر علي بشكل سلبي.
- بعد ما تخرجت بتقدير عالي، عائلتي فضلوا يقولوا مضيعش الفرص اللي جاتلي وأنزل وأشتغل.. بس أنا بقالي فترة طويلة برفض.. أصل هنزل أشتغل ليه؟ أنا عارف إني عمري ما هبقى شخص طبيعي وأتجوز وأفتح بيت مثلاً..!! وعشان ألاقي شغل أصلاً أو أتعود عليه هتبقى معاناة كبيرة جداً ليا..
كنت على طول بتمنى أن يبقى عندي صحاب كثير عشان أخرج معهم وأبقى شخص طبيعي وكده.. في آخر سنتين في الجامعة بقى عندي صحاب كثير نوعا ما.. بس اكتشفت إني أنا اللي ببعد عن الناس وبرفض أخرج معهم بحجة أني تعبان أو مكسل لحد ما يفتكروا إني بكرهم أو يزهقوا مني وما يكلموني ثاني..هذا بسبب إني بيبقى صعب علي إني أمثل إني شخص طبيعي.. أضحك وأهزر وأقول نكت وأنا أصلا مكتئب.. فأفضل أعد في البيت أحسن.. ثاني سبب إني ببقى فاكر معظم الإهانات اللي توجهت لي حتى لو تافهة.. يعني لو شخص وجهلي إهانة من فترة حتى لو طويلة بفضل فاكرها.. حتى لو الإهانة دي تافهة والشخص هذا قريب مني، ببقى شايف إنه ما يستحق إني أكلمه عشان هو يعتبر جزء صغير من المعاناة اللي أنا فيها.
~~~~~
الاضطرابات التي عندي:
- معظم الاضطرابات الشائعة زي القلق والخوف والانعزالية، اللامبالاة والتفكير الكثير وأحلام اليقظة بالساعات، الكسل والخمول.. عندي تشتت عالي جداً.. إحساس بالغباء.. معظم الحاجات اللي كانت بتتشرحلي ما كنت بفهمها خالص لحد ما أذاكرها لوحدي.
- إدمان شديد للعادة السرية والأفلام الجنسية.
-شلل النوم (الجاثوم).. عندي من وأنا طفل صغير.. على طول لما أجي أنام لازم يجيلي.. إلا لما بكون تعبان أوي عشان بدخل في النوم على طول.. عشان كدا بحب أسهر كثير وأنام وأنا تعبان.
كل ما حكيته فوق ذا ولا حاجة بالنسبة للي هقوله دلوقتي..
- النيكروفيليا؟؟ وأنا صغير في حضانة أو ابتدائي كنت بتخيل نفسي بنت وفي حد يؤذيني ويغمى علي وكدا.. لما كنت بتفرج على فيلم وأشوف بنت جميلة تموت كنت بتضايق جداً.. لما كبرت الموضوع تطور.. بقيت بدخل أدور على فيديوهات على اليوتيوب عشان أشوف بنات وهما يقتلوا في الأفلام ودي أكتر حاجة كانت تثيرني.. الموضوع تطور أكثر، بقيت بدور على صور جثث حقيقية لبنات وأدخل أقرأ قصصهم ماتوا ازاي.. الموضوع هذا بيجيبلي اكتئاب شديد جداً جداً.. حاولت أبطل كثير بس مش عارف.. لحد دلوقتي عندي أحلام يقظة إني ببقى بنت وفي حد يضربني ويؤذيني..
- من فترة جبت قطة وارتبطت بيها جداً.. بحبها جداً وبقعد ألعب معها وأكلمها.. بعد فترة بدأت أضايقها، والموضوع تطور إني بقيت بضربها لحد ما أنا أتعب وأدوخ.. وبعد كدا أقعد أعيط جامد وأقعد ألعب معها وأعتذر لها.. كذا مرة القطة تتعب من الضرب وعائلتي تيجي تشوفها يسألوني حصلها إيه أقولهم معرفش.. وهما مش بيشكوا في خالص عشان عارفني مش ممكن أؤذي نملة (أنا فعلاً كنت بتجنب أدوس على النمل وأنا ماشي) ..
أنا عمري ما كنت شخص عدواني.. بس ممكن يكون هذا التغير بسبب حبي لصور الجثث أو للضغط الشديد اللي علي بسبب الاكتئاب..
عارف إن الحل الوحيد إني أبطل أتفرج على الحاجات هذه وأحاول أقلل العادة السرية، وأنزل أسعى وأدور على شغل.. بس الموضوع مش سهل خالص..
- بقى عندي شعور إن الحياة ملهاش لازمة وتافهة.. أنا ليه أعيش في حياة مثل دي وأنا مكتئب وكمان في حروب وقتل وإبادات لما ممكن أموت وأتحاسب وأدخل الجنة إن شاء الله؟
معظم الوقت بفكر في الانتحار بس أنا عارف إنه حرام وغلط جداً، فبفضل أدعي ربنا إني أموت موتة كويسة عشان أخلص من كل اللي أنا فيه دا.. أصل مش هنتحر يعني ((ويبقى عذاب الدنيا والآخرة ))
أنا آسف جداً إني طولت في الكلام وربنا يعينكم على مساعدة الناس دائماً،
شكراً
18/8/2018
رد المستشار
شكراً ْعلى استعمالك الموقع.
ملخص الصحة العقلية للاستشارة
أعراض موجبة
هناك إشارة إلى تشوه الجسد لا يمكن تقييمها.
أعراض سالبة
غياب الاندفاع للعمل والتواصل الاجتماعي.
أعراض معرفية
لا توجد إشارة واضحة.
التوازن الوجداني
نوبات اكتئاب متكررة على خلفية شعور مزمن بالكآبة والقلق.
ملخص الأبعاد الأخرى للاستشارة
مشاكل السلوك
الانجذاب الجنسي نحو الجثث Necrophilia
البصيرة
استبصار عالٍ وكتب إلى الموقع.
مواد كيماوية
لا إشارة إلى سلوك إدماني كيمائي
الصحة الجسدية
لا توجد إشارة إلى مرض جسدي باستثناء الجاثوم.
التعليق:
هناك إشارة واضحة إلى نوبات اكتئاب جسيم منذ أعوام المراهقة وربما صياغة حالتك في إطار اضطراب وجداني مزمن هو ما سيفعله أي طبيب نفساني تراجعه.
أما انجذابك الجنسي نحو الجثث وما تسميه نيكروفيليا Necrophilia وتشير إليه في الرسالة فهو من النوع الكاذب. الانجذاب الجنسي نحو الجثث بمختلف أنواعه ظاهرة نادرة وفي جميع الحالات تعكس شخصية معقدة غير قادرة على التعلق السليم بالآخرين. لا توجد أي علاقة تستحق الذكر بين الانجذاب الجنسي نحو الجثث واضطرابات عقلية
التوصيات:
أول ما يجب أن تفعله هو أن تبحث عن عمل أو أي عمل وتتواصل مع الآخرين. هذه الخطوة بحد ذاتها تساعد على تأهيلك وتحرك عملية تطور الشخصية الذي توقف وتعثر منذ فترة طويلة.
عليك أيضاً مراجعة طبيب نفسي للسيطرة على عدم توازنك الوجداني وعلاج القلق والاكتئاب.
وفقك الله.