إزاي أجذب اللي بحبه
السلام عليكم؛ أنا اسمي يارا أنا بحب ولد معايا في الدرس ومش عارفة هو بيحبني ولا لأ بس هو بيبصلي ولما قلت لصاحبتي إني بحبه قالت لي ده بيحب واحدة ثانية غيرك متحاوليش تفكري فيه
أرجو الرد بسرعة
وشكرا جدا لكم
رد المستشار
"يارا".... هو ينفع يكون حد بيحبك ومرتبط بك ويسيبك عشان واحدة تانية بتحبه؟، طب إزاي يكون بيحب واحدة وعاوزاه يسيبها عشان إنت بتحبيه؟، ولو شايفة إنه بيبصلك، فالأولاد أصلا بيبصوا على البنات عشان شكلهم وزينيتهم ولبسهم، وعشان دي حاجة عند الولاد، يعني مش لازم بيبص عشان بيحبك، ده غير إن أي ولد مهما كان باين عليه إنه كيوت كده وجينتل عمره ما بيحترم البنت اللي كلمته واتعرفت عليه حتى لو حبها، وحتى لو هي عملت كده عشان بتحبه، عشان كده ما يرضاش إن أخته، أو مامته، أو قريبته تحب حد ولا حد يحبها.
الولد دايما بيحترم البنت اللي بتحافظ على نفسها وعلى سمعتها حتى لو تعبته وهو اللي قعد يزن عليها، جالي شاب قبل كده بيقولي إنه بيحب بنت جدا جدا بس مش قادر يتجووزها؟، ليه؟ لأنها كانت بتشوفه ومسك إيديها، وكانت بتضحك على أهلها عشان تكلمه من وراهم فمش قادر يثق فيها خالص!!.
دي الحقيقة اللي بتحصل بين الولاد وبيقعدوا كمان كل واحد يقول للتاني هو بيكلم مين وعمل إيه، وكمان إنت كاتبة عن نفسك أنك مسلمة وفخورة إنك مسلمة صح؟، طب هو ربنا هيرضى على الصحوبية؟، هيرضى على خيانة ثقة ماما وبابا؟، هيرضى نحب من غير جواز؟.
الحب لازم يكون بعديه جواز، عشان الجواز هو اللي بيفرح الأب والأم، والجواز هو اللي بيخلي الناس كلها فرحانه بيكو، وهو اللي بيخلي الزوج والناس يحترموا البنت، هتعملي إيه في ده؟، لو هو ناوي على الجواز وهتستنيه 6أو 7 سنين بس من غير صحوبية عشان ربنا وأهلك، وعشان يلحق يشتغل ويعمل بيت ويجيب طلبات البيت يبقى ماشي، لكن لو هتحبي وتتعرفي وبس يبقى إنت اللي اخترتي تكوني إيه أدام الناس، وأدامه، وأدام نفسك، وإنت حرة في اختيارك.
واقرئي أيضاً ما يحويه الرابط التالي من استشارات: