إغلاق
 

Bookmark and Share

شباب الجنة للنساء فقط ::

الكاتب: الأندلس
نشرت على الموقع بتاريخ: 10/10/2005

السلام عليكم ورحمة الله وبركاته ومغفرته وعتقه

رمضان مبارك إن شاء الله علينا جميعاً

ها قد سلّمتنا يا رب لرمضان فسلّمه لنا وتقبل منا صلاتنا وصيامنا وقيامنا ودعاءنا

ولا تجعلنا من المبعدين في هذا الشهر الكريم بذنوبنا وغفلاتنا

لك الحمد يا رب أن قيّدت شياطيننا في هذا الشهر , فأعنا على أعدى أعدائنا : نفوسنا الأمارة بالسوء ,

ليكون رمضاناً خالصاً لك, وكما تحب يا رب أن يكون وترضى ..

آمين

شهر مبارك بإذن الله

هذه التهنئة لجميع القرّاء : رجالاً ونساءً .. أما ما بعد ذلك من حديث , فهو يصلح أيضاً للجميع فلا يوجد فيما سأقوله عيب أو حرام , ولكن قد يجد البعض حرج من قراءة أشياء تخص النساء .. يعني حاجات حريمي بس .. فمن وجد في نفسه هذا الحرج , فمن فضلك : الموضوع للنساء فقط , ومن أراد العبرة والدرس فليتابع معي ..

أقدم اعتذاري في البداية عن كل ما قد يبدو أن فيه خدشاً لمشاعر الحياء .. فورب رمضان ما هذا قصدت , بل كل نيتي وهدفي هو أن أنفع غيري بتجربتي لعلّ الله تعالى يكتب لي ثواب النصح .. ولأني خايفة عليكم من حاجات تحبط اتلأعمال متكونوش واخدين بالكم منها .. زي اللي حصل معايا ..

خلاصة القصة وما فيها : تعالوا ننتبه كويس جداً لنوايانا , ونتيقظ بكل حواسنا عشان أنفسنا لا تعجبنا بما نؤديه من طاعات في رمضان مهما وجدنا الثواب كبير .. ولنتضرع إلى الله ونسأله القبول .. ففعلاً ليست العبرة بمن سبق إنما العبرة بمن صدق ..

اللي حصل معايا اليومين اللي فاتوا بقا , إني من أول يوم من رمضان والحمد لله ربنا وفقني لكم هائل من الحسنات , كلّمت البنات في المدسة , دخلت 6 فصول , لو كل فصل فيه بالمتوسط 40 بنت يعني المجموع كدة 240 بنت , وعدت مريض , وعملت صلة رحم , وهنأت إخواتي برمضان .. يوميها كنت راجعة البيت عالساعة 3 وأنا فرحانة وأنا بحسب " الغلة " اللي جنيتها في ذلك اليوم من الحسنات .. بس لما رجعت البيت لاقيت إني "مفطرة" طبعاً بعذرشرعي يعني بسبب الحيض , فتضايقت لأني كان نفسي جداً أروح التراويح .. بس مليش نصيب .. فقعدت بقاوبعد كدة إيه .. خلاص .. بس بعد كدة حصل أمر غريب , زي ما يكون الدم اتقطع خالص , ولا كأني كان في بوادر دورة شهرية , فاتخضيت , ليه كدة , معقول الدم اللي شفته مهوّاش دورة وأنا أفطرت خطأ ؟ هل معقول يكون هذا الدم بسبب التعب مثلا – وأنا يحدث معي ذلك أحياناً – أو بأي سبب آخركحدوث الإباضة مثلاً ؟

طب ليه لم أحسب هذه الحسابات قبل ما أفطر في النهار , ده مكانش فاضل على المغرب إلا ساعتين , يعني تعب النهار كله أنا دقته خلاص .. ليه حصل معايا كدة ؟؟

وزي ما بقولوا : بت بشر ليلة وأنا مهمومة جداً ..وقعدت أحسب وأجمع وأطرح عشان أشوف هل أنا فعلا في موعد دورتي الشهرية الاعتيادية , فلاقيت إن لسة في 4 أو 5 أيام لحد ما يحين الوقت الاعتيادي , ومفيش دم , طول الليل ومفيش دم , ومعادش في ألم في بطني أصلاً .. فقبل الفجر في تاني يوم اتوضيت وصليت العشاء وقرأت شوية قرآن , واتسحرت ورحت المدرسة وأنا صائمة .. ولكن إيه , نفسي اتكسرت خالص .. أدركت إن مش بشطارتي جبت حسنات امبارح , بل بتوفيق الله , ما أهو خطأ صغير خلاني أفطر نهار رمضان وأضيع اليوم من إيدي وأضيع التراويح .. قد إيه إحنا ضعفاء يا جماعة , وقد إيه بنوقع في الخطأ بسهولة .. وقد إيه بتعجبنا أنفسنا كمان بسهولة ..

وأخذت أدعو ربنا إنه يجعلها دورة لأني كنت حموت من القهر لو مكانتش دورة لإني ساعتها حكون ضيعت صيام وقيام يوم .. التراويح مبقتش مشكلة جنب صيام الفرض اللي حسيت إني قلبي بيتقطع عليه لأني أفطرته خطأ .. هل أنا وحشة للدرجة دي يا ربي ؟ لدرجة إني لا أستحق صيام رمضان ؟؟؟؟ رحمتك يا رب .

ياااه يا إخواتي .. قد إيه إحنا ضعفا , والله لا نساوي شيء لو ربنا سابنا لأنفسنا وتقديراتنا الشخصية .. أنا شخصياً هضيع خالص ..
حسبي الله ونعم الوكيل , ودعيت ربنا بانكسار .. أن لا يذيقني هذه الحسرة وأن يكون الإفطار في محله ..

ورحت المدرسة والحمد لله ربنا منّ علي لما رجعت لاقيت إن بدأ الدم يتتابع , بعد انقطاع 24 ساعة قلبي كان بقى وقع فيها خلاص ..
فالحمد لك يا رب أن أنقذتني من هذه الورطة اللي كنت حقع فيها .. وأسألك أن تحيطني – وتحيطنا جميعاً – برعايتك حتى لا نضيع ثواب أعمالنا بجهلنا وإعجابنا بأنفسنا .. آمين ..

لمّا كنت بتكلم عن رمضان تاني يوم , وكنت بتكلم عن ثواب الأعمال فيه , وإزاي ربنا يعطينا كل ثواب العمل اللي عملوه غيرنا بناء على تأثرهم بينا , كانت البنات بتقول لي : وانت يا أبلة حتاخدي ثوابنا كلنا , كانت الكلمة دي بتوجعني جدا , لأني قد أكون وصلت لكمية هائلة من الثواب فعلا ولكن لا أستحقها لأنه دخلني عجب ولا حاجة كدة من حاجات النفس تجعلني أخطئ خطأ يطير الثواب كله على بعضه , بل حتى يجعلني هذا الذنب لست أهلاً لصيام فريضة رمضان , ويحصل معايا زي ما حصل أول يوم , كنت بقولهم : لأ مش بالضرورة , صحيح أنا كل الي حتعملوه في ميزاني , بس لو ربنا قدرني وعرفت أصون الحسنات دي ومعملش حاجات تحبط لي ثوابي الهائل ده .. بجد كنت بتوجع من اعتقادهم إني احسن واحدة بينهم .. لأنهم مش عارفين أنا جرى معايا إيه أول يوم .. بس ربي الحليم الكريم سترها معايا .. والحمد لله .. وأنا دلوقت مكسوفة منه جداً .. غمرني برحمته وكرمه , يعني فعلا زي ما بقولوا : هو اللي بوفقنا إلى الطاعة , وهو اللي بيثيب عليها .. ما اكرمك ربي وما احلمك وأوصلك ..

والآن أنا منتظرة على أحر من الجمر الذهاب للتراويح .. ربنا يهنيكم جميعاً بالتراويح وبالصيام وبالقرآن ويلحقني بيكم عن قريب إن شاء الله , والأهم من كدة : يرزقنا الإخلاص ويتقبل منا ولا يحرمنا هذا الثواب بجهلنا ..

بس لي رجاء عندكم جميعاً تدعولي ربنا إني مفطرش في آخر رمضان .. أنا نفسي جداً أصوم بقا وأروح التراويح وأقرأ القرآن .. نفسي أعمل زيكم كلكم .. بس الحمد لله رب العالمين : أنا صمت بأمر الله وأفطر الآن أيضاً بأمره ..

أحلى حاجة : بنت سألتني عن الحائض في رمضان , فقلت لها : تفطر , فقالت لي : طيب ملهاش مزاج تفطر ؟
فقلت لها : مش بمزاجها , إحنا عبيد الله عز وجل : نصوم بأمره ونفطر بأمره ..

بالمناسبة , أنا قررت هذا الرمضان إني أقرأ ختمتين , زي رمضان اللي فات تماما , بس الآن عدّلت من قراري , سأقرأ ختمة لوحدي , وختمة مع بنات الصف العاشر , حيث اقترحت إحداهن أن نقرأ ختمة جماعية كل يوم , وذلك على مدى الثلاثين يوم , وكان نصيبي أنا أن أبدأ بالجزء 15 , ثم تاني يوم ال16 وهكذا إلى أن أصل لنفس الجزء الذي بدأت منه في آخر يوم من رمضان .. يعني سنقرأ ثلاثين ختمة جماعية .. تصوروا الثواب ؟؟

لأ يا ربي , خلاص أنا اتربيت , مش حقول كدة ولا أفكر كدة تاني , حقول : يا ربي هو ثواب هائل , ولكني أسألك أن توفقنا لأداء هذا العمل ثم تتقبله منا وتحمينا من الوقوع في الأخطاء القاتلة : محبطات الأعمال ..

هو ده الحديث الحريمي اللي كنت خايفة لا يكون ميصحش أحكيه على الصفحة , بس أنا شايفة إنه مفيش عيب ولا حرام , لأن دي حاجة ربنا خلقها فينا , نعمل إيه بقا , وعشان كمان الذكور ياخدوا فكرة عن اللي ممكن يحصل معانا من مشاكل .. ويحمدوا ربهم إنهم برا المشاكل دي خالص ..

نكتة بقا على هامش أحداث أول يومين في رمضان : لما أخي الصغير – 12 سنة - عرف إني مفطرة في أول يوم , وكان هو صايم بس إيه مسكين كان عطشان جداً , تمنى أن يكون بنت عشان يقدر يفطر هو كمان ..

بس لما شافني مهمومة وزعلانة ومكتئبة لإني كنت خايفة أكون أفطرت خطأ : حمد ربه إنه مش بنت عشان ميحصلش معاه الأفلام دي !!

سبحان الله ..

أستودع الله رمضانكم ودينكم وخواتيم أعمالكم .. وأسأله أن يرزقنا الإخلاص ويصفي نوايانا ويربينا ويردنا إلى صراطه رداً جميلاً .. آمين ..

ادعولي بقا إني مفطرش في آخر رمضان .. أنا عايزة أجيب العشرة الأواخر كلها مع ليلة العيد .. يا رب .. يا من سترتها معي البارحة , استرها معي في آخر رمضان وفي حياتي كلها , أنا وكل إخواتي في الغرفة دي كلنا يا رب ..

آمين ..

 للتواصل:
 
maganin@maganin.com

 



الكاتب: الأندلس
نشرت على الموقع بتاريخ: 10/10/2005