الكاتب: بثينة كامل نشرت على الموقع بتاريخ: 10/09/2006
اعترافاتي الشخصية: الضحك قال ياسم ع التكشير
إذا كان تبسمك في وجه أخيك صدقة فما بالك لمّا تبتسم في وش زوجتك واللا تضحك في وجهها ، إزاي ممكن فعلا نعيش من غير ضحك،صعب.. بل مستحيل، لكن الأهم هل نقدر نعيش من غير ضحك داخل بيوتنا؟ هل نقدر نبث روح المرح والابتسام والبهجة بين الأربع جدران في بيوتنا؟ مهم جدا نسأل نفسنا هل نضحك من جوه قلبنا فعلا لكن الأهم هل نضحك مع زوجنا أو زوجتنا من جوه القلب فعلا؟ هل نقدر أن نواجه صعوبات الحياة ومشاكل العالم بالضحك؟ والأهم من الضحك كده لوحده، هو الضحك مع بعض، بل والأهم جدا هو الضحك لبعض.
أهمية الضحك فى الحياة العائلية بتختلف من حد للتاني وممكن كمان البعض يعتبر هذا ترفا ورفاهية، والبعض يرى أهمية كبرى له.... الضحك قال يا سم على التكشير، عم صلاح جاهين قاللنا كده ومصدقينه، وأنتوا ممكن تحسبوها ببساطة تقعد مع حد مكشر مهموم وعاقد الحاجبين ورافع المنكبين ومديها بوز شبرين ولا تقعد مع حد فاكهها عشان ربنا يفكها مبتسم ومبتهج، شوف أنت بقى لو عايش في مكان واحد وفى بيت الزوجية مع زوج لا يضحك، ثم إنه لا يحاول أن يُضحك زوجته، ممكن الدنيا يبقى شكلها إيه، ليس مهما من وجهة نظري إنك تتكلم مع زوجتك ويكون بينكما حوار بقدر ما أحس أنه مهم جدا أن يبقى بينكما حوار باسم ضاحك، الضحك مع الزوجة والضحك بين الزوجين هل هو شفاء للنكد وهل هو علاج للمشاكل وهل هو ضرورة نفسية وزوجية، هل أنت راجل مسئول وقد مسئولية إضحاك زوجتك ولا أنت من إياهم؟
يا عزيزي قل لزوجتك نكتة حتى لو مضحكتش، آديك حاولت، ابتسم في وجهها واضحك لها تضحك لك زوجتك والدنيا كمان، لا تبخل على راحتك العائلية بضحكة ولا تحرم نفسك من بهجة مع زوجتك، الضحك مش فرض ولا واجب عليك بل هو حق ليك ولزوجتك فالضحك يذكرها بحبك وبوجودك وبحضورك وباهتمامك وبقدرتك على بث الأمل، والضحك يقنعك ببهجتها واستجابتها، الضحك يصحصح الأحاسيس وينور فوانيس الدماغ، ويهب الثقة ويقوى العواطف، ويعمق السعادة، والضحك يُلقى بفضله راحة واستراحة على حياتك الزوجية، الضحك ذكاء في مواجهة نكد الحياة والضحك مع الزوجة ذكاء عاطفي فى مواجهة جفاف المشاعر، اضحكوا ومالكوش دعوة خلى الباقي على الله.
المواد والآراء المنشورة على هذا الموقع تعبر عن آراء أصحابها ولا تعبر بالضرورة عن رأي الموقع
Copyright @2010 Maganin.com, Established by: Prof.Dr. Wa-il Abou Hendy - , Powered by
GoOnWeb.Com
إذا كان تبسمك في وجه أخيك صدقة فما بالك لمّا تبتسم في وش زوجتك واللا تضحك في وجهها ، إزاي ممكن فعلا نعيش من غير ضحك،صعب.. بل مستحيل، لكن الأهم هل نقدر نعيش من غير ضحك داخل بيوتنا؟ هل نقدر نبث روح المرح والابتسام والبهجة بين الأربع جدران في بيوتنا؟ مهم جدا نسأل نفسنا هل نضحك من جوه قلبنا فعلا لكن الأهم هل نضحك مع زوجنا أو زوجتنا من جوه القلب فعلا؟ هل نقدر أن نواجه صعوبات الحياة ومشاكل العالم بالضحك؟ والأهم من الضحك كده لوحده، هو الضحك مع بعض، بل والأهم جدا هو الضحك لبعض.
