اضطراب عصبي تطوري غير محدد
عايز أعرف أنا عندي إيه وكيفية العلاج؟
أنا أعاني من تعب نفسي منذ الصغر وذهبت لكثير من الدكاترة وكل دكتور وله تشخيص أنا اتشخصت إن عندي اكتئاب مصاحب بوسواس قهري, واتشخصت إن عندى اضطراب وجداني ثنائي القطب, واتشخصت إن عندي رهاب اجتماعي ووسواس, واتشخصت إن عندي اضطراب فى الشخصية.
وأنا مش عارف أقتنع بأي تشخيص لكن اللي أنا متأكد منه إن عندي وسواس قهري منذ الصغر, من عمر 5 سنوات تقريبا متمثل في إني مش بحب أشوف السيراميك أو أشوف نقط سوداء عليه كذلك لا أحب النظر إلى الحسنات في أوجه الناس, وكنت طفلا عنيدا جدا وعنيفا جدا وأهلي جربوا معي الضرب منفعش, جربوا الحنية منفعتش، بس أنا اتدلعت جامد ومعتمد على والدتي فى كل شيء لحد دلوقت يعني مثلا الأطفال بيحبوا يشتروا ملابس وكده وأنا ولا حتى في العيد, وبرضو لما بستحمى العمارة كلها بتعرف ده وأنا صغير.
لما وصلت لسن البلوغ بدأ يجيلي خجل وكسوف وأحس إن الناس كلها بتبص عليا ومليش أصدقاء خالص لحد دلوقتي وبدأ يجيلي صور وسواسية مؤلمة في دماغي تجيلا مثلا صورة إني قتلت أمي أو إني هقتلها وأبكي بالساعات بس الحمد الله الموضوع ده انتهى دلوقتي، أنا حاليا بعاني من كثرة القلق وساوس قهرية متعددة ضعف غريب في قوة الإرادة مش عارف أواظب على أي حاجة بس الحمد لله مواظب على الصلاة ودي من أكبر مشاكلي حاليا مش عارف أواظب على أي شيء حتى غسل الأسنان وكل شوية برأي جديد وقرار جديد متقلب في الآراء والقرارات بسرعة البرق؛
وعندي طبعا قلة ثقة بالنفس وكثرة أحلام اليقظة وبمل بسرعة من أي حاجة وأنا حاليا باخد مودابكس 50 وأريببراكس 10 وديبرام 40 كل واحد قرص وجربت أوقف الدواء جالي اكتئاب مزمن وأنا شايف إن الدواء مثبت حالتي مش بيحسنها وأنا ماشي على الجرعة دي بقالي سنين لأن الدكتور اللي كان بيعالجني توفى وأنا مش مستريح مع أي حد بعديه يعني من الآخر مش عايز أغير العلاج لأن جسمي خد عليه.
فيه حاجة نسيتها وهو إني من 4 سنين تقريبا وأنا عندي تلعثم جالي في سن 17 تقريبا مكنش عندي وأنا صغير وبتلعثم حتى وأنا بقرأ مع نفسي مش قدام حد بكرر أول حرف من الكلمة ونفسي ألاقيله حل أنا حاليا ذهني مشتت جدا ومش أعمل إيه فى المشاكل اللي عندي وأتصرف إزاي مع العلم إني ذكي جدا الحمد لله وكمان عندي نقص غريب في المهارات الاجتماعية ومعرفش آخد وأدي في الكلام أو أعبر عن اللي جوايا بطريقة سليمة ومعرفش أبص في وجه حد ومعنديش صبر أبدا ومتعجل في كل شيء كفاية كده مشاكل أنا عارف إن اللي هيقرأ كل ده هيتعب لأن كمان أنا بجيب حتة من هنا وحتة من هنا والكلام مش مترتب وأنا متأسف على الإطالة الكبيرة دي.
22/01/2015
رد المستشار
شكراً على مراسلتك الموقع ثانية.
أعطى الموقع رأيه بالتشخيص والعلاج قبل عامين. رسالتك الحالية تؤكد بصراحة صحة تشخيص الموقع وتوصياته التي تم نشرها بتاريخ التاسع من أيلول 2013.
عقاقيرك الآن حسب التسلسل الوارد في رسالتك:
1- مضاد للاكتئاب هو السيترالين Sertraline.
2- مضاد للذهان Aripiprazole.
3- مضاد للاكتئاب Imipramine.
العقاقير أعلاه تساعد السيطرة على بعض الأعراض التي تشكو منها ولكنها غير كافية لكي تدخل مرحلة الشفاء والتأهيل الاجتماعي والمهني.
اعمل بما نصحتك به سابقاً واطلب من طبيبك المعالج إرشادات عملية والحديث مع معالج نفسي له خبرة في علاج الاضطرابات العصبية التطورية.
وفقك الله.