التعامل مع الناس والزواج
صباح الخير,
بليز أنا باعته مشكلتي وعاوزة دكتور علاء مرسي هو الذي يقول لي رأيه في اللي حقوله.
أنا خلاص مبقتش عارفة أتعامل مع الناس خالص علطول فيه سوء تفاهم لدرجة أن الموضوع وصل أني مبقتش عارفة أتعامل مع مامتي كمان مع أننا أصحاب جدا بس بقينا على كل كلمة بنتخانق.
أنا عارفة إن هي أعصابها تعبانة من ساعة وفاة بابا بس أنا كمان تعبانة وعندي مشاكل مع كل الناس وخناقات علطول واللي بسمعه بعد كده أصل إحنا كنا بنهزر. يعني ألاقي واحدة صاحبتي جدا بعتالي رسالة بتشتمني فيها وبتقولي أنا مش عاوزة أعرفك ثاني ولما كلمتها عشان أصالحها مع أني مكنتش عملت لها حاجة لقيتها بتتخانق معايا أوي ولما دخل ما بينا أصحاب عشان يصلحوا قالوا لي إنها كانت بتهزر ولما أنا كلمتها قالت تاخد الموضوع جد وتتخانق معايا. ومن كده كتيير
حتى ماما ممكن نكون بنتكلم في موضوع هايف جدا وألاقيها قلبته أنها عايشة بس عشان تطمن عليا وإنها لو كانت مضايقاني أوي كده يبقى يا رب تموت وتقعد تعيط وتدعي على نفسها، أنا بجد مش عارفة أتعامل مع أحد ولا عارفة أحكي لحد لو حاجة مضايقاني لأن كل الناس لازم تطلعني غلطانة ويحكموا عليّ من وجهة نظرهم هم ومش بيراعوني ولا بيراعوا مشاعري أنا.
عندي مشكلة ثانية وهي أني عندي 26 سنة ولسه مش متجوزة وأنا الوحيدة اللي في العيلة اللي مش متجوزة كله متجوز حتى اللي أصغر مني فطبعا بقيت أنا الغريبة اللي فيهم وكل ما نتقابل مع قرايبي يقعدوا يلوموني لأني بيجيلي ناس كتيير بس مش بيحصل نصيب مع حد فيهم (من الآخر أنا مش مقتنعة إن بقى فيه رجال) وكل اللي بيجولي دائما بيكون شخصيتي أقوى منهم مع العلم أني مش شخصية قوية أوي أصلا. فكل قرايبي وإخواتي يلوموني ويقولولي أنت لازم تتجوزي ولو أي حد مش لازم تنقي يعني.
كل صاحباتي متجوزين ولما يشوفوني يقولولي خليك كده أحسن أنت كده في نعمة بلا مسؤولية بلا وجع دماغ، أنا حاسة كأني واقفة في النص وناس بتشد فيا من هنا وناس بتشد فيا من هنا وأنا مش عارفة أعمل إيه.
أنا حتى مبقتش أحب لا أتقابل مع أصحابي ولا أروح تجمعات للعيلة لأن الكلام كله بيبقى علي أنا وعلى أني لسه مش متجوزة.
أنا عمر ما حد حبني ولا في الكلية حد كان عاوز يصاحبني مع أن صحابي كلهم كانوا مصاحبيين وخرجوا من الكلية اتجوزوا علطول وناس تانية خالص غير اللي كانوا مصاحبينهم، أنا نفسي حد يحبني ويحسسني أنه عاوزني أنا مش جوازة صالونات وخلاص.
أنا آسفة أني طولت بس والله أنا جوايا حاجات أكثر بكتتيييير من كده بس مش عارفة أطلعه :(
05/02/2015
رد المستشار
صديقتي؛
من الصعب أن تكون المشكلة في الآخرين دائما وعلى مختلف المستويات، الأرجح أن تكوني شديدة الحساسية مما يصعب التعامل مع البعض مثل أمك وأقاربك ومعارفك، ومما يتيح لبعض المعارف السطحيين فرصة الهجوم عليك لإغاظتك على سبيل المزاح الثقيل السخيف.......... من المحتمل أيضا أن تكون أمك شديدة الحساسية هي الأخرى، مما يؤدي إلى ما وصفته من تواصل معطوب بينكما.
أما عن صديقتك التي تتشاجر معك ثم يقول آخرون أنها كانت تمزح ثم تتشاجر معك ثانية وتقول أنه لم يكن مزاحا، فيجب أن تفهمي وجهة نظرها كما تريدين أن يفهمك الآخرون ويحسون بك ويتعاطفون مع مشاعرك، مثل الزكاة، يجب عليك إعطاء الآخرين ما تريدينه منهم أولا ثم بعد ذلك يجب تقييم ما إذا كانوا أهلا لهذا العطاء والاستمرار فيه.
أما عن الزواج فأنت تقفين موقف المفعول به، أولا ما هي مواصفات شريك الحياة الذي تتمنينه؟ ما هي مبادئه؟ هواياته؟ مستواه التعليمي؟ ثقافته؟ مقدار صبره وتفهمه؟ مرونته الفكرية؟ صدقه؟ رومانسيته؟ صبره؟ اهتمامه؟ تعامله مع المسئولية؟
ثانيا: ما هي صفاتك الملائمة له وهل صنعت من نفسك المرأة التي يريدها مثل هذا الرجل؟ لو قابلته اليوم ما الذي سوف يجعله ينجذب إليك ويريد الارتباط بك؟
أما من ناحية أقاربك وأصدقائك الذين يلومونك على عدم الرضا بأي شخص لمجرد الزواج، فعليك الرد بالمقولة الشهيرة "الجواز قسمة ونصيب، ادعوا لي ربنا يبعث ابن الحلال"... ولكن يجب أن تؤمني بما تقولين وأن يكون عن طيب خاطر.
أنصحك أن تراجعي معالجا نفسيا لمناقشة فكرتك عن نفسك وعن الحياة والصداقة ووضع خطة للتطوير من نفسك
وفقك الله وإيانا لما فيه الخير والصواب
ويتبع >>>>>>>>>>>: نفسي حد يحبني: فراغ عاطفي أم مراهقة متأخرة ؟