مشكلتين في حياتي
اسمي عبدالله ٢١ سنة عاوز استشارة في مشكلتين
أول مشكلة
أنا من صغري بحس إن كل اللي حواليا بيكرهوني حتى أهلي لما كبرت الموضوع ده قل عندي بس بقى عندي مشكلة إني بحب أحس إني بتحب بحب الاهتمام في نفس الوقت مبحبش أبقى عندي صحاب بمعنى تاني مش اجتماعي خالص معرفش حد في دفعتي بحب أقعد لوحدي مبحبش التجمع بس لو فيه تجمع بقعد فيه عادي مبكونش مضايق بحس كتير إني بحب كل حاجة وعكسها في نفس الوقت
المشكلة التانية
أنا طالب في كلية هندسة جامعة الأزهر
من صغري بكره المذاكرة وبكره الحفظ أي حاجة فيها حفظ يتتعبني جدا جدا ومبقدرش أحفظها في الآخر كنت متفوق في المرحلة الابتدائية الدراسة بس مبذاكرش بمجرد ما الدرس يتشرح لي كنت بفهمه ومش بحتاج أذاكره تاني في المرحلة الإعدادية مكنتش بذاكر برضو كنت بنجح من غير مذاكرة (بدرجات قليلة طبعا) فضلت كدا لعند تالته ثانوي فكنت بذاكر في تالتة ثانوي قليل جدا ويمكن دي أول مرة كنت أذاكر فضلت كدا لعند شهر ٣ وقررت إني أأجل السنة لأني كنت متأكد إني لو دخلت الامتحان مش هجيب المجموع اللي بحلم بيه وفعلا أجلت والسنة التانية ذاكرت بجد وجبت 90 في المائة ودخلت هندسة في محافظة قنا وده كان حلمي
بس للأسف رجعت مش أذاكر تاني أول سنة (إعدادي هندسة) جبت جيد جدا ودخلت القسم اللي بحبه مدني بس المشكلة بقى إني مش قادر أذاكر كل حاجة مش لي خلق أفتح كتاب كل ما أقرر أذاكر ألاقي نفسي بنام أو بشغل نفسي بأي حاجة عشان أهرب من المذاكره حتى القرآن محفظتش المنهج اللي علي.
الامتحان باقي عليها أقل من شهر وأنا معرفش أي حاجة في المواد وخايف أسقط أنا الحمد لله بصلي وبقرأ قرآن وعلاقتي بربنا كويسة
مش عارف أعمل إيه
21/4/2019
رد المستشار
مرحبا بك يا "عبد الله" معنا على مجانين
احتياجنا للحب والونس والصحبة حق كل البشر وافتقادك لإشباع تلك الاحتياجات يجعلك تشعر مشاعر سلبية، ومن يطلب شيء يسعى إليه، وأول الأخذ العطاء، إذا أردت شيئا أعطه وسيعود إليك.
لا تتوقع أن تحصل على الاهتمام دون أن تعطيه أو أن تجني ثمار المحبة دون أن تزرعها في قلوب الآخرين.
مرن عضلات قلبك بالعطاء وسوف يتسع للجميع.
معتقد الكراهية لديك مع بعض أخطاء التفكير ينغصان عليك عيشتك حتى استذكارك ودورك كطالب علم معطل إلى حد ما على الرغم من تفوقك الملحوظ والذي يعكس شخصية ذكية قادرة على الفهم والاستيعاب السريع فأنت لست قليل الفهم أو فاشل إذن!!
فلم تجعل ظواهر الأمور تبدو غير ذلك وتعكس حقيقة غير حقيقتك
أرى أنك بحاجة لأن تتعلم بعض المهارات الاجتماعية وتصحيح أفكارك تجاه الآخرين وتجاه مستقبلك
بعض الجلسات مع م.س.م (معالج سلوكي معرفي) سوف تفيدك كثيرا