مراجعة القرآن
قبل أي شيء.. بدل ما نحاول نخلي مجانين فعلا قاعدة إنترنتية عالمية.. إيه المانع من إننا نحل مشكلاته الأول؟؟؟ والمشكلة الأكبر طبعا هي تأخر الرد وبياخد وقت فعلا طويل.. طب ليه منخليش المشاركات مثلا في أسرع وقت بدل ما تبقى هي والرد على المشكلات سيان؟؟؟
السلام عليكم ورحمة الله وبركاته.. دُمتم على ما يُحب أن يراكم الله عليه دائما.. اللهم آمين..
أساتذتي الكرام.. دعوني أحدثكم بالآتي.. أنا طالب بالفرقة الأولى لكلية الشريعة والقانون وصدقوني.. الامتياز لو فعلا قدرت أتحصل عليه هيكون إنجاز فعلا رائع يُحسب ليا كشخص ولكثير فعلا من اللى بيحبونى بوجه عام, المهم السنة اللي فاتت الإحصاء الرسمي كان (30 جيد جدا و1 امتياز)من الدفعة والإحصاء دا مش قالقني أبدا ومخللينى كل قوة إني أكون الواحد دا..
المهم الحمد لله رغم إن دفعتنا فيها كل عوامل الفشل زى ما حضرتك تقول بمعنى الكلمة بجد, والدكاترة بيتعاملوا معنا على أساس إننا فعلا كلنا شيء واحد, إلا إني كلي تصميم إني فعلا أثبت العكس وإن في نماذج فعلا محترمة في الدفعة دي مهما كانت قليلة ولازم تكون كدا.
المهم بدأت من ساعة ما انتظمت بعد العيد مباشرة لأني انشغلت برمضان وإني أخليه لرمضان وبس, والحمد لله بدأت بخمس ساعات هلاقي برضه حد من حضراتكم يقول لي (يا ابني مش بالكم.. بالكيف) هقوله (حضرتك مش عارف حسابي لأني بحسب الكم وبقيس عليه الكيف) فمادة مثلا زى (القانون الدستوري) لو ذاكرتها بحوالي 20 صفحة هيكون مع تلخيص(مذاكرة ورقة وقلم يعنى) فعلا كويس هيدخل الوقت من حوالي (4 ساعات لخمس ساعات) ولو خلليتها 30 صفحة هيدخل معايا في حوالي (7 ساعات) وهكذا, فالحمد لله ماشى الحال وكله على ما يُرام عندى إلا شىء واحد,أنا دلوقتى بوصل الحمد لله في أيامي اللى مش بروحها لـ 9 و11 ساعة بس متفرقات طبعا وممكن أقولهم عشان لو حد يستفاد.. 3 إلا شوية من الضُهر للعصر, وقول 2 من العصر للمغرب فهيكون الناتج=5, وباخد من المغرب للعِشا رست ومن بعد العِشا مباشرة وقول من 7,5 لحد 1 ونص بس في فواصل محدودة كدا أمشى فيها رجلي ولا حاجة.. والحمد لله قول من 7,5 لحد وقول ساعة بتروح مني وبيفضل 5 ومعانا خمسه فوق هيكون الناتج=عشرة بيكون فيهم ساعة للقرآن وال9 قول مادتين بس فعلا بيكون فيهم شوية ضغط على نفسي وبخلص فيهم أجزاء الحمد لله جميلة.
المهم أنا فعلا غير إني موقن إن ربنا هيكرمني إن شاء الله لكن طبعا لازم آخذ بالأسباب وأحل مشكلاتي بنفسي قد ما أقدر، وعشان كدا جات مشكلة القرآن, دلوقت أتميت حفظ جزء من أصل 6 والحمد لله ماشى تمام جدا لأن كل يوم صفحة وكدا هخلص على آخر شهر 2 ويكون عندي 3 شهور ونص مراجعه.
فإن شاء الله كله تمام في كدا، لكن المراجعة، أنا كنت براجع اللي حفظته في أسبوع في يوم الجمعة مثلا، فدلوقتى لا يوم جمعة ولا غيره, هراجع ازاي جُزء في يوم الجمعة ولا جزأين تلاته في يوم ولا خمسة لما أخلصهم؟؟؟؟
فدى بجد مشكلة مزهقهاني من الأول وكنت ولازلت حابب جدا أجيب امتياز في القرآن لأنه بيتبني عليه حاجات كتير جدا وحضراتكم عارفين نظرة دكاترة الكليات النص شريعة ونص قانونية زى اللي أنا فيها، باختصار لو عملت اللي عليّ كما يُرضى الله, وجيبت جيدا جدا مفيش أي مشكلة, الكارثة لو جيبت أقل منها, فهل طريقة مذاكرتي كويسة وإيه حل مشكلة القرآن لأني فعلا لو جيبت امتياز هتريحنى جدا جدا على المدى البعيد وتكون دفعة أكبر ما يكون...
مشكلاية تانية تعتبر دراسية برضه... أخويا فى تانية اعدادى ومتمرد بجد وبيقول لأمى (لأ.. مش هجيب) وكلام من دا وبجد بيشتم ويعمل حاجات تخللينى عاوز أضربه لكنى بكون ماسك نفسي كويس ومش بمد أي يد أو رجل عليه وبتعامل معاه بمبدأ التهزيق مش أكتر... وعن الدراسة صدقوني مش بيفتح أي كتاب ومفتحش أي كتاب من أول السنة غير مرة وأكون كذاب لو قلت إنه عدا الـ 10 دقايق وقفله على طول وكان عنده امتحان قبل كدا باين إنجليزي وكان بيقول مش عارف بصراحة إيه اللي عندي بكره..!!!
فالرجاء حل مشكلتيّ وشاكر ليكم جميعا وربنا يكرمكم ويقدركم على فعل كل الخيرات..
اللهم آمين.
04/11/2007
رد المستشار
السلام عليكم ورحمة الله وبركاته؛
يبدو من كلامك أنك تعاني من مشكلة في تنظيم الوقت اللازم لمهمة محددة وإدارته وتزاحم الأفكار برأسك هو أحد الأسباب المؤدية لذلك.
أما بالنسبة للقرآن فمشكلته بسيطة بإذن الله:
حاول أن تجعل القرآن جزءًا من حياتك اليومية بحيث تجد نفسك قد راجعته بدون أن تدري وذلك قد يبدو صعبا في البداية فقط بمعنى أنك ستحتاج لوقت كثير حتى تراجع نصف جزء قبل مذاكرتك يوميا إلا أنك مع الوقت سيتقلص الوقت اللازم لأداء تلك المهمة.
كما أنك تقدر أن تقرأ ثلاثة أرباع مرتين قبل وبعد المذاكرة قراءة جيدة بدون أن ترهق نفسك لتسميعهم وتأكد بإذن الله أن ذلك سيُحْدِث فرقا في نهاية الأسبوع عندما تراجع بحفظ ما تيسر لك ولقد اعتمدت بنفسي تلك الطريقة عندما كان مقررا علي نفس الكم من القرآن لحفظه وبدون مبالغة قدرت بفضل الله على مراجعة المنهج كاملا في زمن لا يتعدى الساعتين ويجب أن تذاكر القرآن برغبة وحب وتوجه لله عز وجل حتى تستريح نفسك عند مذاكرته ويثيبك الله عليه.
وبالنسبة لأخيك فعليك أن تتعامل معه بلغة يفهمها غير النصح الجاف والذي لن يتقبله حاول أن ترغبه بنظام المكافأة في المذاكرة وانظر ماذا ترى؛ يحضرني الآن دعاء علمته لنا أحد المدرسات قبل المذاكرة: (اللهم إني أسألك فهم النبيين وحفظ المرسلين والملائكة المقربين واجعل لساني عامرا بذكرك وقلبي بخشيتك وسري بطاعتك فأنت حسبي ونعم الوكيل سبحانك لا علم لنا إلا ما علمتنا إنك أنت العليم الحكيم ربي اشرح لي صدري ويسر لي أمري واحلل عقدة من لساني يفقهوا قولي إنك ربي على ما تشاء قدير).