حبني أحسن لك

رد المستشار

الحب، بيتعب قوي يا روان، بيخلي القلب بيدق، والتفكير طول الوقت، وبيعذب، بس كمان الحب لازم يكون ليه آخر، هنفضل نحب وبس؟، ولا عادي يعني مش مهم الي بحبه يكون بيحترمني؟، كنت لسه مع ولد بيحب بنت وبتكلمه وبيقولها كلام حب وهي كمان بس متردد جدا انه يتجوزها علشان بقى مش واثق فيها تصوري؟، كمان الحب لازم يكون مربوط بالجواز، طب هو ليه مش بيقولك يتجوزك ويكلم باباكي؟، يعني هو مش عارف انك بتحبيه؟، الي بيحب بيحس مفيش كلام، أومال بترني وتتكلمي وهو مسافر عشان تعرفي الريال بكام مصري؟،

وكمان فيه حاجة، انه أكبر منك وقدامه بنات كتير، ليه هيفكر في حد لسه بيروح مدرسة؟، وهو الي بيحب حد يعرف عليه بنات تانيين، يعني انتي ممكن تحبي واحد أو تكلميه وتتعرفي عليه وتهزري معاه وكده وانتي بتحبي ده؟، لو بتعملي كده يبقى مش حب، الي بيحب لازم يكون شخص مخلص، ولازم يكون ناوي يكمل مع حبيبه، لكن دي تسلية مش أكتر، وهو لو عاوزك تبقي زوجته كان هو الي هيقول لأن الرجل لما يحب بنت ويعوزها تكون زوجة بيفضل ورا أهلها لغاية ما يوافقوا، وهو معملش كده وكمان مع بنات تانيين الله أعلم بيقولهم ايه، وخايفة لو أهلك اكتشفوا انك بتخونيهم أو بتستغفليهم هيبقى الدنيا بينون عاملة ازاي؟

أنا رأيي لو بيحبك يحترم نفسه ويبقى مخلص ويطلبك من أهلك عشان يثبت حبه واحترامه ليكي ولبيتك، لو مش كدة يبقى الأحسن نركز في دراستنا عشان نثبت لنفسنا اننا ناجحين ومتفوقين ومحترمين ونستاهل الناس تحترمنا وتجري ورانا عشان نوافق عليهم، سلام يا قمر.

المستشار: أ. أميرة بدران