عاشقة ومظلومة والنبي..!
أستمر في خطبتي ولا كفايه كده؟
أنا بعثت لكم قبل كده وأفدتموني بجد وفعلا عملت بنصيحتكم وأنا انهاردا ألجأ لكم بجد في مشكلة في نظري كبيرة، آسفة أوي على البداية دي بس بجد تعبانة أولا أحب أشكركم على الموقع الجميل ده اللي بجد أفادني ويفيد غيري.
موضوعي هو أني مخطوبة من شهر 8 اللي فات وبحب خطيبي جدددددددددددددددددددا وهو كمان بيحبني، بس مشاكلنا كل يوم بتكبر لدرجة أني خائفه أنها تؤثر على مستقبل جوازنا بعد كده خاصة إن ممكن يتم كتب كتبنا خلال الإجازة دي خايفه جدا أني أتسمي مطلقة من كثر خلافاتنا اللي بتخليني في أقل حاجة أني أرتاح بانفصالي في لحظة غضب من الشيطان بس أنا مش شايفه أني بغلط مش بغلط لما أقول له على كل حاجة مش بغلط لما آخذ حبيبي وخطيبي أنه صديق لي اللي هو لحد دلوقتي مش عارف معنى كلمة الصداقه ايه هي أنا من وجهة نظري الصداقة هي لما إنسان يكون تعبان من حاجة ونفسه يحكيها لحد يروح لأقرب الناس له وهو أقرب لي من نفسي فبحكيلوا على كل حاجة حتى اللي بتحصل معايا في الكلية ولما طلبت أنه يكون صاحبي رفض بشكل ماقت بحجة أن الصحوبية من وجهة نظره أن لازم أحترمه وأحطه في اعتباري.
الصحوبية من وجهة نظره أني لما أعمل حاجة أحطه بين عيني إن مش يكون لي أصحاب غيره بحكم الغيرة، لأن حصل معي موقف وأنا بجد ندمت أني حكيت له عليه هو من واحد من زمايلي بيهزر معايا مسك إيدي بهزار فشديت معاه وحطيت له حد من تصرفه ده وغلطتي أني جيت وحكيت له ولما قلت له إحنا ليه مش أصحاب قال لي وفكرني بالموقف ده قال لي فاكرة لما حكيت لي كذا وكذا ضحكت وقلت له إحنا صحاب وكنت بقلك على حاجه مضايقاني، اتهمني أني مش بحترموا بس قالها لي بأسلوب مهذب وعلشان كده مش هينفع نكون أصحاب... هل غلطتي أني صريحة معاه؟
أنا تعودت طول عمري أني أكون معه صريحة حتى في غلطي لأن اللي بيني وبينه مش حب سنة اللي بيني وبينه حب 7 سنين من عمري و7 سنين عمر بحاله، كلمة قالتها لي بنت خالي لو الإنسان اللي بتحبيه حاول يأخذ حاجة وأخذها حتى لو بتحبوا بعض وبتموتوا في بعض هيجوا عليكم أيام مش هتطيقوا بعض من كتر الخناق هو خد حجات مني بس مخدش كل حاجة وللأسف برضايا خايفة أن يكون كلامها صح وإن اللي احنا فيه ده عقاب من ربنا، بس أنا مش هقدر أعيش في المشاكل ده بس أنا لو سبته ممكن أموت مش بروحي لا بإحساسي لأن ده الراجل الوحيد اللي هز قلبي ومشاعري.
آسفة لو كنت طلت عليكم
وشكرا
4/5/2010
رد المستشار
السلام عليكم ورحمة الله وبركاته؛
أهلاً وسهلاً بك يا "خلود" معنا مرة ثانية. بداية أعتذر عن تأخري في الرد لأسباب خارجة عن إرادتي.
صديقتي وأختي الصغيرة؛
إنها سبع سنين ومازلت لا تعرفين الشخص الذي تتعاملين معه تماماً ولن تعرفيه كما يجب إلا بعد أن تجتمعا تحت سقف واحد.
نعم إنها غلطتك في أنك صريحة في كل شيء. المثالية عالم غير موجود في حياتنا فليس المطلوب منك أن تكوني بغاية الصراحة بل المطلوب أن تكوني صريحة بحكمة أي تختاري كلماتك وتضبطي نفسك قبل أن تصارحيه. وتذكري أن طريقة تفكير الأنثى تختلف كثيراً عن طريقة تفكير الذكر ولو أحببت أن تتعرفي أكثر على هذا الجانب فاقرأي كتاب الرجال من المريخ والنساء من الزهرة..
أما عن علاقتكما فإن كان فهمي صحيحاً فما يجمعكما هوخطبة وليس قران وبالتالي فإن حدود العلاقة المسموح بها ضيقة للغاية، ولا شك يا أخيتي أن الله لبالمرصاد فانتبهي وراجعي نفسك واختاري إما أن تعقدا قرانكما فوراً أو تتراجعي عن أي تجاوزات غير شرعية. عزيزتي: إن الله تعالى لم يحرم حراماً إلا وفي تحريمه صلاحنا. فإن كان الأمر صعباً فهو ليس أصعب من عقوبة الله في الدنيا فضلاً عنها في الآخرة...
قد ترغبين أن تكملي معنا المشوار وستجديننا دائماً بإذن الله..!
أعتذر مرة ثانية عن تأخري وأدعو الله أن يلهمك رشدك..