من أنا ..؟ لا أعرفني ... الشخصية الحدية

المشكلة مني أم منهم!! من أنا..؟ لا أعرفني...

مرحبا؛ أنا حبيت أستشيركم بصراحة أنا كل عيلتي بيحكولي معك حالة نفسية أو ما بيسموه انفصام شخصية.

أنا لما كان عمري 16 سنة بصف أول ثانوي طلعلي ثعلبة برأسي وصلعت الحمد الله بعد علاج راحت الثعلبة المهم أنا كان كتير في مشاكل بحياتي مع أهلي كانوا مهمليني ولأن أخواتي الأوائل وأنا مش شاطرة كتير صار في حساسية دايما بيسألوهن كيف عملتوا بالامتحان وأنا لا، وصلت لدرجة أني جرحت إيدي كلهم لدرجة أن إيدي صارت مشوهة.

صرت أمسك إزاز ودايما أجرح حالي بنبسط لما أشوف الدم بس طبعا بدون علم حد وصرت أجرح رجلي كمان، صار كم مشكلة مع المدرسة وانحلوا طلعت على التوجيهي صرت أدرس وأجتهد عشان أدخل جامعة زي أخواتي الأخريات بيدرسوا هندسة واحدة تخرجت والتانية سنة تالتة أنا ما بعرف ليش في عنا تمييز عنصري بالبيت أنا نجحت بالتوجيهي وأبوي ما درسني بحجة أن وضعه المادي مش كل هاد بس إحنا وضعنا المادي ممتاز جدا وعنا بدل الشركة شركتين.

أنا من النوع العصبي جدا ونمرودة صارلي سنتين قاعدة بالبيت أبوي ما بيعطيني مصروف بحجة أني ما بروح مكان وأن ما بيلزمني أبوي بيتباها بأخواتي الأخريات أنهن جامعيات وجابوا معدل عالي أنا مش عارفة ليش هيك بيصير معي مع أن أكتر من مرة حاولت أتفاهم مع أبوي بس أنا خلص بطلت ما بدي شيء من هالحياة أنا صرت كاتبة وصرت أكتب خواطر وروايات ولما حكيت لأبوي صار يقلي طز فيكي وبكتاباتك ومشاعرك كمان.

أنا أكره أهلي لدرجة مش طبيعية بجد بكرهم كلهم أنا وصلت لدرجة من الانعزال مش طبيعية أنا بظل قاعدة لحالي بالغرفة في مرة كنت كتير تعبانة نفسيا نمت لأسبوع كامل وما كنت أقوم من الفراش وأظل متخبية وأبكي تحت الفراش.

أنا حبيت واحد من الأردن بس هو لسا بدو تاني 6 سنين لنتجوز أنا انصدمت! قلت له بستناك وأنا دايما بيجيني خطاب وما برضا أنا ما بدي فلوس أنا بدي حنية بدي أحس بالأمان يللي بعمري ما حسيته مع أهلي دايما بسبو علي دايما بيحكولي متخلفة وفي مرة كسرت باب إزاز على أخوي لأن قفل الباب علي وما رضي يفتحلي الدم كان كله على الأرض أبوي جاء صار يسب علي وراح على الكمبيوتر ولا كأني بنته انجرحت ومع العلم أني ما بآخد مصروف أنا حوشت حق الإزاز وعملته مني.

أنا تعبت كتير بحياتي بجد أنا بكره الكل وبحكيلهم ما بدي أتجوز اليوم بيحكيلي أبوي صاحبته بدها تيجي تشوفني مشان ابنها قلت له ما بدي أتجوز صار يقلي ابلعي كندرة أنا كل ما أحكي شيء بموضوع نقاش بيكونوا بيتناقشوا فيه وأشارك بقلي ابلعي كندرة مع أن الكل بيكون بيحكي قلت له إذا جوزتني راح أتبرى من العيلة وكمان مش راح أسامحكم لا دنيا ولا آخرة.

أنا هلأ مش عارفة وين المشكلة بالضبط أنا كل يوم بالليل ببكي وبظل لحالي وبأرجل باليوم 7 روس أرجيلة بس مشان أتفشش وأفش غلي فيها أحيانا بضرب حالي وأحيانا بصير أعض إيدي بمناطق مختلفة.
أنا فعلا مش عارفة المشكلة من مين!!
مع العلم أني بصوم وبصلي ولما أعصب بسير أكسر الأشياء وأضرب رأسي بالحيط

أنا وقعت ضحية الحب 3 مرات مش عارفة من وين ألقاها هو حظي بالحياة ولا أهلي يللي بيكرهوني ولا حظ الحب.

اليوم أختي بتحيكلي روحي موتي مش راح نقلق فيكي ولا كأنك كنت موجودة بحياتنا لما بشوف صاحباتي كلهم بالجامعة وبيحكولي عالنت أنهم مبسوطين وأنهم بيروحوا وبيجوا والله إني بزعل مش قصة غيرة بس بسير أحكي ليش أنا مش زيهم!!
وفعلا أنا هلأ مع أن عمري 19 ولأني ما بشوف اهتمام من أهلي من ناحية حب أو حنية أي حد بحكي معي لفترة معينة بحس حالي إني بحبه هو مش حب بس بسير أحب اهتمامه فيني بجد أنا تعبت من هالحالة وبدي أخلص، ومش عارفة أراجع طبيب نفسي بمنطقتنا أنا حبيت أستشيركم بالأول!!!

مشان الله ساعدوني
والله أنا تعبت من الحياة تعبت من كل شيء تعبت من حالي تعبت
12/06/2013