بنت فالصو

رد المستشار

 ولدي الحبيب، عندك حق أنك تتألم حبيبتك تسيبك، ولما تفضل تدور على أصحاب و ما ترتاحش، وحياتك في البيت مملة ومحدش فاهمك ولا حاسس بيك، لكن تقدر تقولي انك انت فاهم نفسك وعارفها؟ فكرت إنت ليه وحيد؟، ليه مالكش أصدقاء؟، فكرت الناس لما بتحب بعضها بتحب بعضها ليه؟، سايب انت كل ده وعمال تفكر تموت كافر!.

الراجل بجد ما يكسروش حب فشل، الراجل يبص على نفسه ويشوف هي محتاجة ايه عشان تتطور وتبقى أحسن، أبوك وأمك مش حاسين بمشكلتك ولا فهمينها مش دي المشكلة معظم الأهل للاسف كده مع ولادهم وطبعا ده مش صح، بس ده يبقى سبب انك عمال تشحت الحب من أي حد؟، ده يخليك تستحمل سخرية وقلة ذوق من اصحابك الي كانوا معاك في اعدادي؟، السؤال الصح ليه انت بتقبل ده؟، ليه بتستحمل ده؟.

أنا بكلمك كراجل لانك فعلا بقيت راجل وكبرت، والحقيقة أن احساسك بأنك مش مقبول وانك مش هتعرف تعمل حاجة في حياتك وتنجح فيها هو الي خليك تجري وتدور طول الوقت على حد يديلك أي حنان، حتى البنت الي انت متصور انك بتحبها موت، الحقيقة الي انت مش عاوز تشوفها أنها بتتسلى، هو فيه حد يحب حد بجد يقبل ان يبقى ليه علاقة بحد تاني؟، هو فيه حد بيحب حد يسيبه بسرعة ويلضم مع حد بعديه على طول كده بسرعة؟، ده البنت لما بتحب راجل بتبقى عمالة تستأذنه كأنه ابوها، وكل الي بيغير منه بتبعد عنه، وهي بتقولك أفكر!!،

إنت عارف حقيقة البنت دي في حياتك ايه بالظبط؟، هي كانت رمز جواك للحب والجنان والاهتمام، رغم أنها مش كده، وعشان هي جواك من صنع خيالك واحتياجك انت بتتصور انها بتعوض المشكلة القديمة مش اكتر ومش عاوز تصدق أنها مش كده عمال تكدب تصرفاتها، وتبرر خيانتها وعمال تفكر نفسك بس بالمواقف الي ممكن تقول أنها بتحبك ومش عاوز تشوف اصلا أنها سبتك وراحت لواحد تاني، كل الألم الي انت فيه بسبب انك بتحس من تاني انك راجع للوحدة وعدم الحنان مش البنت نفسها خالص لانك لو فكرت بعقلك هتلاقي عقلك بيقولك إن فيه حاجة كده مش مظبوطة في تصرفاتها لو بتحبك، شغلتك دلوقتي الصح انك تفكر في "احمد"، تفكر ازاي تخليه يقف على رجليه ويثق في نفسه، تخليه يبص لنفسه بصة كويسه ويبطل يقوله انت فاشل ومش نافع، مارس رياضة بتحبها وانجح فيها؛

ذاكر عشان تبقى احسن ومستقبلك يبقى احلى، اتعلم انك تقول لاء بشياكة، وترفض الي مش بتحبه مع أي حد، خليك فاكر ان الناس ما بتحبش المغرور، ومابتحبش بردو الي موافق على طول الخط، بتحب الشكل المهندم، والريحة الحلوة والسنان النضيفة، بتحب الي يسمعها ويفكر معاها في مشاكلها من غير نحنحة زايدة، بتحب المتفوق والناجح، بتحب الي دمه خفيف، شفت انت وراك حاجات كتير تعملها ازاي؟

فوق لنفسك وما تتألمش عشان واحدة ما قدرتش مشاعرك، الراجل الصح يشتغل على نفسه ويبني نفسه وبعدين يبقى يشوف لما يبقى حلو كده مين الي ينفع تناسبه من البنات، وساعتها هيحط مشاعره في المكان الصح ويسعدها ويحترمها لانها هتحبه وتسعده وهتحترمه اكتر منه، انسى الكلام الفارغ بتاع الانتحار ده، واشتغل على نفسك، ربنا معاك.

المستشار: أ. أميرة بدران