تمثيلا لعقلاء مجانين الصعيد: أهلا بك ::

الكاتب: أ.د.وائل أبو هندي
نشرت على الموقع بتاريخ: 18/06/2007

عبد السلام الجالى (مصر، مدير حسابات، 58 سنة، مسلم).

بداية أشكر للقائمين على هذا الموقع العاقل جدا جهدهم جعله الله في ميزان أعمالهم وجزاهم خيرا عن كل مجانين وعقلاء البلد والبلدان العربية.... عرفت الموقع بالصدفة البحتة... مش بحتة اوى لكن من خلال تنويه أحد الأفاضل في بريد الأهرام، ولفت نظري العنوان "هل يدل ذلك على شيء في شخصيتي سوي أو غير سوي"، المهم تصفحته يوما وراء يوم وازددت علما وثقافة باعتباري مثقف شويه لكن تلاحظ لي أن لا مجنون يمثل الصعيد في الموقع ولا مجنون يمثل شريحة كبيرة من أهل بلدنا "أصحاب الجلاليب الزرقاء" أقصد الفلاحين فسولت لي نفسي أن أنحشر للتعبير عن هاتين الشريحتين لكسر حدة مشاكل أهلنا في بحري ولإثبات المساواة معهم إن لم يكن في الخدمات فعلى الأقل في المشاكل.

لا أدري هل تقبلون بي أم هل يوجد الكثير مني وأفوت عليكم بعدين... إحنا كمان عندنا هموم بس للحق مش عارفينها أو عارفينها ومطنشينها أو مش عاوزين نعرفها واللي عرف عمل إيه؟ ... إيمانا بالله والحمد لله قوي ومضاد لكل بعد الشر مرض لكن حقيقي والله أنا استفدت جدا من الأساتذة العظام إلي بيكتبو في الموقع والى بيردوا على مشاكل الناس وعملت زي مدير شكسبير اللي سأله في يوم أنت ليه حضرتك مشهور أوي كده؟ قال له لأني بكتب شعر الناس بتحبه... قام قاله أمال كلامنا ده يبقى إيه قال له يبقى: نثر قال يا نهار ابييييض لي أربعون سنة بتكلم نثر ومش عارف.

وإحنا لينا كام سنة عيانين ومش عارفين ربنا يكرمك ويوفقكم... إن قبلتموني فقط رحبوا بي وإن سكتوا هعرف أنه علامة رفض... المهم حد يرفض أي حاجة ولو كان طلبي ودمتم.

9/6/2007

سلام الله عليك يا عبد السلام.... نورت مجانين الله ما أجمل كلماتك، وما أحوجنا لدعواتك ودعوات أمثالك ومن يتمنون أن يكونوا أمثالك... قادر يا كريم...

ألف أهلا وسهلا بأنات الفلاحين، وأنات أهلنا في الصعيد، وإن كنت شخصيا مخلطا مولود في الفيوم ومراهق في الحجاز أو بين نجدٍ والحجاز كنت في المويه الجديد، ثم طالب طب وأخيرا أستاذ جامعة في الزقازيق، يعني في مدينة الزقازيق..... ومربوط في الكرسي أخربش على شاشة مجانين بعيني وأضع على شاشته ما أخربش به،...

يا عم عبد السلام بالنظر العميق لسنك الحالي، أهلا وسهلا أهلا وسهلا لكن أرجوك أرسل مشاركاتك على

إيميلي الشخصي@مجانين.كوم (mailto:abohendy@maganin.com) في شكل ملفات وورد مرفقة ومصححة لغويا ومراجعها اتنين شهود... وسننشر تباعا إن شاء الله، وبعدين على مجانين نحن نقول لأ ولألألألألألألألأ ..لأ براحتنا خالص، وربنا يجعل كلامنا خفيف عليهم.
أهلا بك.