مش عارف أنا عاوز إيه في البداية السلام عليكم ورحمة الله وبركاته. أنا بصراحة مش عارف أقول إيه ولا أبتدي ازاى بس أنا لما قرأت بعض المشاكل على الموقع تشجعت أني ابعتلكوا وأتكلم معاكوا عن مشكلتي: أنا طالب في السنة الرابعة بإحدى الكليات العملية من أسرة متدينة مشكلتي أنا مش عارف إيه هي أنا هابتدي أكلمك عن حياتي اللي فاتت باختصار لحد دلوقت نشأت زى ما قولتلك في أسرة متدينة من وأنا صغير وأنا الحمد لله أحفظ كتاب الله، أصلي على طول في الجامع كنت وخد بالك من كلمة كنت دي من أشطر الناس في الدراسة وكنت على طول باخد ترتيب على المدرسة وأوقات على المحافظة المهم أنا فضلت كدا لحد تقريبا آخر الصف الثالث الإعدادي والسبب تقريبا في اعتقادي لأن بابا سافر للعمل بالخارج وأنا في آخر سنة في ابتدائي. المهم من أولى ثانوي وابتديت أتغير بس تغير بطئ الأول ابتديت أعرف ناس معايا في المدرسة مش ميولي خالص ابتديت أهرب من المدرسة وابتديت أعمل حاجات عمري ما عملتها زى الهروب دا ابتديت أكذب على ماما عشان آخذ فلوس اكتر وكان ممكن اخترع دروس عشان آخذ فلوس المهم كانت المصيبة في نتيجة أولى ثانوي أنى رسبت في تلات مواد والحمد لله نجحت. وفى السنتين التانين زى مابيقولوا كدا اللى كان مغمض ودخل دنيا المهم أنا في السنتين دول عملت حاجات عمري ما كنت أتخيل إني أعملها مافيش حاجة ماعملتهاش (سفر مخدرات زنا شذوذ......) حاجات كتير وأنا مش باقولك كدا الى باجاهر بالمعصية لا الحمد لله أنا دلوقت تبت عن حاجات كتير، المهم دخلت كلية ماكنش متوقع أنى ادخلها وأهم حاجة في الكلام دا أنى في تالتة ثانوي أيام الامتحانات كنت أعاني من سلبية جامدة أوى يعنى كان ممكن يبقى عندي امتحان الصبح ومش مذاكر وتلاقيني في الشارع خارج باعمل أي حاجة والسلبية دي لسه معايا لحد دلوقتى والمصيبة أني ابتديت أغش بطريقة غبية لدرجة أني بقيت محترف غش ومارست الغش من تالتة ثانوي تقريبا لحد السنة اللي فاتت (تالتة كلية وعلى فكرة أنا اتمسكت السنة اللي فاتت وعمل لي محضر غش) بصراحة هو كان قلم وحش أوى بس مش حاسس انو غير فيا بدليل إن عندي امتحانات ولسة ماذاكرتش. المهم أنا حاليا في آخر سنة زى ماقولتلك باتعامل مع الكلية بسلبية جامدة اوى لدرجة أني خلال التيرم كلوا ممكن ماروحتش غير كام مرة بسيطة مع العلم أني عندي سكاشن ماروحتهاش غير كام مرة كدا وطبعا دا بينقص من أعمال السنة وأنا عارف وعادى ودا تاعبنى جدا ومش عارف اعمل اية وماتضحكش وأنا باقولك مش عارف أعمل إيه لأن الموضوع مش متعلق بأني أصحو بدري وأروح الكلية لأ أنا حاسس أني دي من جوايا الكسل دا، وعلى فكرة في الأجازة اللى فاتت أنا كنت مسافر شغل في شرم كنت بانام 12 ساعة كنت باقول دا ممكن عشان تعب الشغل المهم لما جيت عشان الدراسة أنا حاليا مش عارف هاتصدق ولا لأ أنا بانام اكتر ما بصحى يعنى ممكن انام 13 ساعة او 14 ساعة ودا معقدنى جدا وحاولت كتير أني اضبط النوم دا بس مش عارف بجد اضبط المنبه باقفلوا وأكمل نوم ممكن أخلي أصحابي يصحوني...... يصحوني وأنام ويتصلوا تانى اقفل الموبايل خالص ولو حد صحانى في البيت مابصحاش وممكن أتعصب وازعق.ودا مخلينى مش عارف أعمل أي حاجة في حياتي وخصوصا الدراسة لأن كليتي بدري 7 الصبح وكدا وأنا تقريبا باصحى على 2 او 3 حاولت أني أنام بدري زى ماهتقولى وعملت كدا بقيت باصحى بردوا متأخر بس مش أوى على 10 او 11 بس مابقدرش أنتظم على كدا، ومشكلة النوم دي تقربا من أهم المشاكل اللي معقداني وفكرت كتير أني أروح لدكتور نفساني بسببها بس كل ماجى أعزم على أنى أروح حاجة تقولى لا وارجع تانى اقول هاروح أقولوا اية وعلى فكرة دى حاجة من الحاجات اللى خليتنى ابعتلكوا وتانى حاجة أنى دايما مش عارف أنا عاوز إيه أو بمعنى أصح ماليش هدف ولو حاولت أني يكون ليا هدف مابعملش حاجة علشانوا واضعف بسرعة ودا طبعا مخليني انظر لنفسي ممكن على إني ضعيف. والحاجة التالتة أنى أوقات ربنا يكرمني ووووأرجع عن أي حاجة وحشة أنا باعملها وأصلي وابتدئ أقرأ قرآن وابعد عن أي حاجة وحشة باعملها بس المشكلة أنى بارجع بسرعة بس لما بارجع بارجع على مصيبة يعنى بقى معروف لأصحابي اللي جنب أوى إن أنا لما أصلي هو أسبوع وأعمل مصيبة أزني مثلا كدا ودا مجنني مش تاعبنى باحس إن أنا مش عارف أقولك إيه باصلي وباعصي ربنا. والمشكلة أني على طول لما باشوف حد من أصحابي بيعمل حاجة وحشة أنا بانصحوا وباكون أنا أوحش منوا بجد أنا زهقت من نفسي ومش عارف أعمل إيه يا ريت حد يرد عليوأنا آسف أني طولت عليك بس أنت ماتعرفش انا قعدت أد إيه عشان أكتب الكلام دا يارب تردوا عليا بسرعة وياريت لو رديت عليا تبعتولى ايميل عشان أبقى عارف لأني مابقعدش حاليا على النت غير لفترات وأكون شاكر كتير لو رديت علي.31/12/2006
