مشكلة اجتماعية
بسم الله الرحمن الرحيم؛
أنا M من الإسكندرية، عندي 30 سنة، زوجه وأم ل3 أطفال، في البداية عوزة أشكركم جد على الموقع دا وربنا يجازيكم عنا خير.
أنا عندي اكتر من مشكلة، والحمد لله على كل حال بس حبدئ بمشكلة مشكلة عشان ما أطولش عليكم، أنا بئالى 12 سنة متزوجة ولغاية انهارده مش قادرة أئتلف مع زوجي مع وجود الحب بينا بس للأسف مفيش بيننا أي حوار، مع أنى أمتاز بشخصية سوية ومهذبة و.... و... الحمد لله، وكمان مستوى التفكير بيننا واحد ومتقارب منيش جاهلة بأمور الحياة أو مجال شغله لكن أي حوار بيننا لازم يقلب بخناقة.
مع أنى أختار الوقت وأهيئ المكان وأعمل ألف حساب لكل موضوع ومفيش فايده دا بالنسبة لأي موضوع لو كان بيننا خلاف عائلي، أو على موضوع فقه أو سنة أو سياسي أي حاجة أو أنه يلتزم الصمت نقعد كأننا خرس مش عرفه هو بيعمل ليه كده عشان متكلمش معاه خالص، وللعلم مواعيد شغله بتتطلب أنه ميعقدش في البيت اكتر من 4 ساعات فقط يعني فترة الكلام مش حتتعدى نصف ساعة لكن لو عندنا ضيف، أو إحنا في أي مكان يا سلام إنسان متكلم ومش عاوز حد يتكلم غيره وعندي بطة بلدي على رأي هنيدي ههههه.
المشكلة أني زهقت من كتر ما بطلب منه الكلام معايا والاهتمام بي وبقيت بتحرج والموضوع بئا فيه إهانة لكرامتي واشتكيت لوالدتي ولكل حد قريب مني يفتكر إني سورى بطلب.... لكن أبدا والله في الموضوع دا بالذات يمكن هو ما بيتكلم معايا إلا عشان أوافق عليه، ولما بقول لاء طبعا يقول لي يبقى خلاص مالكيش عنده حاجة طول ما مش مخليكى محتاجة حاجة مالكيش عليه سيبيه دا راجل وهو حر، وشوفي فلانة عايشه ازاي احمدي ربنا على اللى انتى فيه انتى عاوزة ايه.
يا ناس أنا مالي أنا عاوزة أعيش حياتي أنا زي منا عاوزها عاوزة راجل ابئا أنا كل حياته ويبقى هو كل حياتي لما يكون عنده مشكلة، يجي يحكيها لي ونحاول نشوف لها حل سوا نصلي استخارة ونفكر سوا ونلاقي الحل ونفرح بالنجاح ليه لاء؟؟
هيا الحياة الزوجية كده راجل بره البيت يشقى ويشتغل ويتخنق ويخش البيت مبوز وماليش حق أسأله فيه إيه؟؟ ولو سألته مفيش، ويعيش في البيت كأنه غريب مالوش دعوة بأي حاجة لا بأولاد ولا بطلبات معنوية فقط لكن مادية بصراحة فوق النمرة واحد .
علاوة على أنه دائما مشكك في تفكيري وقدراتي أني اش عرفك انتى انتى تفهمي إيه؟ وبالمناسبة لو قلت أي رأي يسخر منه ويضحك لما شككني في نفسي وخلاني لما بتكلم مع أي شخص مش بعرف أتكلم كويس ولو حسيت أنى تكلمت كويس مع أي حد أسأله: أنا رخمه أنا مش بفهم أنا هايفه دا لو حد قريب طبعا أما معاه عشان يهرب من الكلام معايا يفتعل أي حاجة عشان يقفل الموضوع ويمشي مع أنى أقسم بالله بيتي بيت ناجح ونظيف ومرتب وأولادي ناجحين ومتفوقين بسم الله ما شاء الله ومؤدبين وناجحة في كل علاقاتي .
حاولت أني أشغل نفسي بحاجات ثانية عشان أحل عن دماغه وأمشي حياتي بسلام اشتركت فى صناع الحياة إسكندرية وكونت مجموعة من البنات والشباب وكان مشروع ناجح وجميل افتعل مشكلة ومنعني من استكماله بدخل نت منتدى عمرو خالد وشات ومواقع كتير أخبار فلك متنوعة، ومع إن ساعات وجوده قليلة إلا أنه يتصل بالتليفون إنت قاعدة على النت أقول ايوة يتخانق ويحلف أن ما عدش نت، وكان قبل منها بقعد أنا وجارتي زوجها ضابط جيش ومش بيجي إلا يومين في الأسبوع رفض بردو أي حاجة أحاول أشغل نفسي بها يرفضها لما اتخنئت ومش عارفة أعمل ايه مفيش قدامي إلا أني أطلب أبغض الحلال وأهدم بيتي وابوظ نفسية أولادي أو أهدم أعصابي وأتجنن مش عارفة أعمل إيه هل أنا غلط فعلا وست شاذة عن الستات ولا أنا باطلب حياة زوجية هاديه ومشتركة.
أنا عاوزة منكم الرد هل أنا صح إني مش عاوزة أسيب فراغ في حياة زوجي إن ممكن حد يدخل فيها ويجره لحاجة غلط، أو ليا أنا إن ممكن حد يستغل مشكلتي دي ويجرني لطريق غلط ربنا يعافينا آمين مش من حقي شريك يسمعني ويكلمني ويحسسني أني موجودة في حياته لي قيمة ثانية غير المتعة والشغالة والمربية ومديرة المنزل فين كياني كإنسانة ليا رأي ووجود؟
هي الحياة الزوجية إني آكل وأشرب وأرب أولاد وأقضي حاجات زوجي من متعة فقط أنا أرفض أني أكون كده لو هي دي الحياة،
بالله عليكم تشوفوا لي حاجة أو حل يكون معقول؟
14/04/2006
رد المستشار
سيدتي الفاضلة:
لا تغضبي إذا استعملت كلمة سعيد صالح أو عادل إمام لا أذكر أيهما في مسرحية مدرسة المشاغبين: بعد اربعتاشر سنة خدمة في ثانوي..... جاية تقول لي أقف.
سيدتي كتبت أن تعليمك متوسط وهذا لا يقلل من شأن ثقافتك وقدراتك العقلية..... ولكن هل زوجك أيضا متوسط أم أنه جامعي؟؟؟؟
سيدتي أحيانا يبدأ الإنسان طريقا ثم يقوم بتعديل مساره أثناء الرحلة فيصل به أي بالطريق أو بنفسه إلى ساحات وميادين ما كانت لتمر على طريقه الأول هل فهمتني يا ابنتي؟؟؟ واضح أن زوجك اختار منذ 12 سنة أو أكثر حسب فترة الخطوبة فتاة متوسطة التعليم..... بسيطة الطموحات لأنه أراد امرأة في فراش وأما وربة بيت..... فقط.
كان هذا اختيارا واضحا وممنطقا في رأسه..... ولصغر سن أو خبرة أو أي شيء آخر أنت وافقت على هذا الزواج..... وبمرور الوقت تعلمت بنفسك وبدأت تدخلين ساحات جديدة من المعرفة والعمل والتفاعل..... وبذلك بدأت تطالبين بحقك المشروع كامرأة لها شريك..... وهذا لم يكن شرطه يا ابنتي من البداية..... وعلى ما يبدو ليس أحد شروط محيطيك..... أي عائلتك وأصدقائك..... بدليل تعجبهم من طلباتك وإحساسهم أنك امرأة غريبة تتبطر على ما حباها الله به من نعمة.
كان لابد من هذه المقدمة لتفهمي الموقف معي..... قبل أن نصل معا إلى حل يريحك، لا تحاصريه بطلب التحاور..... فالرجل بطبعه صياد..... والفريسة السهلة لا تستهوي سلاحه..... بدليل أنه في المحافل العامة يحب أن يثبت أنه عليم ببواطن الأمور وظاهرها كلها....."بطة بلدي" على رأيك.
فهل سيتغير ويحاول التحاور معك..... لا أحد يستطيع أن يؤكد ذلك..... ولكن تصرفاته توحي أنه يبحث عنك إذا ابتعدت عنه حتى بأفكارك..... فاتصاله المستمر بك ورفضه عملك مع صناع الحياة وحواراتك في المنتديات الهادفة يدل على غيرة من أن ينفلت جزء من اهتمامك إلى سواه.....
إذن يا ابنتي كفي تماما عن محاصرته وطلب الحوار والحديث..... وواصلي شغل نفسك وتنمية مهاراتك..... واحتمال أن يبدأ هو في البحث عنك والتقرب إليك..... والأكيد أنك ستكونين أسعد حالا، ولا يمكن لأحد أن ينصحك بالطلاق..... وأنا شخصيا لا أجد له سببا قويا..... فمن غير المعقول أن يدفع أبناؤك ثمن قرار اتخذته يوما ما قبل أن تثقفي..... أو تنضجي..... أو يحدث أي تطور لشخصيتك..... ولا تخافي أن تجر زوجك أخرى..... فالرجال الذين تجرهم أخريات ليسوا دائما الذين لا يتحدثون مع زوجاتهم ولكنهم رجال عندهم استعداد لتجربة أخرى ولا يبدو أن زوجك من هذا الصنف.....
كما أن خوفك على نفسك من أن يجرك أنت شخصيا شخص يكلمك ويهتم بك..... أصابني بصدمة قوية..... فأي صناعة للحياة هذه وأين تجدين هذا الشخص الوضيع الذى يسمح لنفسه بغواية امرأة متزوجة؟؟؟ أكيد ليس على منتدى عمرو خالد.
ولو كل امرأة لا يتحدث إليها زوجها أو يهتم بمشاعرها تكون عرضة للخيانة..... فعلى الدنيا السلام، فإذا وجدت أنك لن تستطيعي الاستمرار بدون هذا الحوار..... وأنك تخافين على نفسك الفتنة..... فبالطبع عدم سقوطك فى الرذيلة ولى بالاهتمام من نفسية الأبناء..... بس على الله لا ينخرس لسان الزوج الثاني بعد الزواج..... حيث أن أغلبهم يدخل البيت وهو بالع سد الحنك.
ويتبع>>>>: بره بطة بلدي وجوه بالع سد الحنك مشاركة