اتجوزه ولا؟؟؟؟؟
أنا طالبه عندي 21 سنه هحاول بقدر الإمكان اختصر مشكلتي أنا كنت بحب واحد من حوالي سنتين وهو كمان وقولت لماما وبابا وكان الموضوع ماشي كويس وأنا والله العظيم ماكونتش بقابله خالص أنا شفته مره واحده بس وهي المرة إلي تعرفنا فيها وكانت في المواصلات وبعدها بدأنا نتواصل من خلال النت وحبينا بعض وماما وبابا كانوا عارفين وحتى التلفونات أنا كنت رافضاها لغاية لما يكون بينا ارتباط رسمي المهم حصل أمور كتير ووالده ماوافقش عليا من غير حتى ما يعرفني لان إلي أنا مرتبطة بيه ضعيف الشخصية جدا قدام والده وكان والده عايز يجوزه بنت صاحبه
المهم انه فعلا تم جوازهم وأنا طبعا عديت بمرحلة صعبة جدا جدا وكان الحب الأول في حياتي وطبعا عديت مشاكل كتير مع نفسي المهم الحمد لله عديت المرحلة دي لكن كان برضو من فتره لتانيه بفتكره وبحن ليه لكن كنت بمسك نفسي وأقول انه ما كانش كويس وسابيني المهم في الفترة دي كان في واحد تاني على النت أتعرفت عليه من زمان جدا وكان بينا صداقه محترمه وكويسه وكان طلب انه يتقدملي لكن أنا رفضت ورجعنا أصحاب عادي تاني على النت وبس وهو عرف إلي حصل من الشخص ده>
وأنا كان الفترة دي عندي فراغ عاطفي كبير جدا لقيت نفسي بقوله عن عرضه القديم ليا ولقيته مرحب جدا بيه ويتمناه كمان وفعلا هو حبني حب كبير جدا حتى من قبل ما يشوفني وأنا ما عرفش ازاي عملت كده لكن ما كونتش بحبه لكن كنت بحاول بنسى بيه الأول وما عرفش ازاى عملت كده أنا فعلا وحشه جدا وبكره نفسي على كده المهم أنا إلي طلبت منه أننا نتقابل وفعلا جالي كليتي ووقفت معاه والله خمس دقائق بس علشان كل واحد يشوف شكل الثاني وبس وهو للعلم قدي في السن لكن اكبر مني بسنه في الدراسة وهو من كليه نظريه وأنا كليه من كليه حاسبات وهو حقوق.
المهم انه حبنا قلب حياته خالص وفتح محلين ليه واشتغل وبقى بيكسب كويس حتى وهو في الكلية ومرت الأيام وهو قال لأهله وأنا قولت لماما وبابا واقسم بالله أننا ما كوناش بنتقابل ولا بنعمل اي حاجه وحشه خالص في مشكله بالنسبة لي انه كان طيب وحنين وكويس وبيحبني جدا بس هو غير وسيم وجسمه مليان شويه وهو خس علشاني اكتر من 40 كيلو ولسه بيخس لكن شكله مش وسيم مع انه طيب.
المهم انه جه وقابل بابا فعلا أتقابلنا أنا وهو وماما في مكان عام وبابا أعجب بيه وبأفكاره وهما عيلة كويسه وكل حاجه بس المشكلة عندي أنا المشكلة أن أنا طول عمري كنت زي اي بنت تتمنى فارس الأحلام الوسيم الشيك إلي في مركز مرموق مهندس أو دكتور مثلا وهو للعلم ضامن شغله بعد تخرجه كويس وهو شغل كويس وكمان هو مالوش جيش لأنه وحيد يعني هنجوز علطول بعد ما يتخرج هو يعني سنه خطوبه وبعدين جواز على طول وبابا معجب بيه لأنه بيشتغلو بيكون نفسه ومخطط حياته صح وملتزم بس المشكلة زي ما قولتكم انه مش وسيم وقولت ده لبابا وقالي أنتي ممكن تغيريه وتخلي يهتم بلبسه اكتر ويكون شيك وهو دلوقتي بيخس كمان وكمان وبابا بيقول انه مشغول وبيشتغل ومش فاضي لنفسه قوي بس أنا ممكن أغيره.
أنا مش عارفه اعمل أيه أوافق ولا أنا والله نسيت الأول ده نهائيا والتاني ده طيب وكويس كفاية انه جه وقابل بابا وماخافش وبيشتغل لكن أنا فيا عيب خطير أني مثلا بقول أشمعنا فلانة تاخد واحد وسيم ومهندس مثلا وأنا لا أنا نفسي أتغلب على نفسي وابطل الحقد ده مع أني والله مش اقصد احقد وبتمنالها السعادة من قلبي بس مش عارفه خايفه أوافق عليه واظلمه معايا وأكون من جويا مش راضيه أنا مابحبوش حب جنوني ولا حاجه اه أنا برتاحله بس مش حب جنوني يعني لكنه لما بيعدي فتره مابنكلمش بفتقده بس أنا خائفة أكون بحب حبه ليا.
أنا هاتجنن خلاص وكل يوم بعيط ومش عارفه اعمل أيه أوافق عليه ولا هل وافقت أكون بكده ظلمته وظلمت نفسي ولو اتقدملي واحد تاني أفضل منه اسيبه وده حرام عليا لان أنا لو وافقت هتكون خطوبتنا بعد سنه علشان يكون هو خلص دراسة لأنه رايح رابعة انا مش عارفه اعمل أيه أنا هاتجنن خلاص أزاي أتغلب على نفسي إلي عايزه أفضل ومش بتكون راضيه أزاي أنا تعبانه جدا جدا جدا
أرجوكم ساعدوني وأنا والله مش وحشه إلا في دي بس أني مش راضيه ومش عارفه أنا بحبه ولا بحب حبه ليا مع العلم أننا مش بنتقابل ولا بنتكلم في التلفون خالص كله على النت وبس وأنا نفسي اربط الكلام وحبه بيا بالحقيقة ومش عارفه عايزه أحبه بجد أحبه بجنون لأن هو يستاهل اعمل أيه؟
11/08/2006
رد المستشار
السلام عليكم ؛
بتكلميه على النت بس؟؟ وهو النت يا بنتي شوية؟! أنا مش شايفة إيه المشكلة أنك ترفضي عريس معجب بك وأنت مش معجبة بيه. إياك تخديه جبر خاطر عشان بعد كده هتكون رقاب اللي تتكسر مش خواطر.
لنتحدث بجدية الآن لا يتزوج الناس فقط بسبب الحب المجنون والمظاهر فالمجنون يعني غير طبيعي ومصيره يشفى ويصبح متزن وهادي وعادي، والمظاهر تتغير مع الزمن وتبقى حقائق الأمور.
تفرض عليك جدية الشاب والتزامه معاملته بالمثل يوضح كلامك أنك غير معجبة به وزاهدة فلا تطيلي آماله واقطعي ما بينكم بغض النظر عن منطقية أو عدم منطقية موقفك يجب أن تحترميه وتراعي مشاعره.
ارفضيه حيث أنه ليس فارس أحلامك ولكن دون أن تتوقعي ظهور الصورة المرسومة في خيالك إلى أرض الواقع، ارفضيه حتى وإن كان من غير المحتمل أن تحصلي على عريس شبه عريس صديقتك فلانة سيمة وقيمة فكل إنسان ينال من الدنيا ما كتبه الله له.
لا بأس من رفضه ولكن في الحكم على الناس وفي القرارات المصيرية يلزمنا تفكير أكثر عمقا من مجرد المظاهر. لا توجد في الحياة قرارات صحيحة ومضمونة ولكنا نختار ما يناسبنا ونستطيع التعايش معه فإن كان مظهرا بسيطا وحياة عادية ليس ما تريدين لنفسك فهو ليس خيارا مناسبا وإن كنت تبحثين عن إنسان محب تشاركيه حياته فهو مناسب.
أشعر بحالك عين في الجنة وعين في النار وللخروج من هذا الصراع يجب أن تحددي ما تريدين لحياتك القادمة وإن كنت قادرة على تنفيذها معه، دوني ما يعجبك فيه وما لا يعجبك كوسيلة تساعدك على اتخاذ قرار أكثر منطقية من مجرد مظهره, فلا يصلح مظهره ولا تعودك اهتمامه معيار للاختيار ويمكنك مراجعة ما كتب عن اختيار شريك الحياة سواء على الموقع أو على إسلام أون لاين.
واقرئي أيضا:
الجلسة الأولى لاختيار شريك الحياة
حيرة كل فتاة عند اختيار شريك الحياة
اختيار شريك الحياة : هل من ضابط ؟
اختيار شريك الحياة مسئولية من؟ويتبع>>>>>>>>>>>: إياك تاخديه جبر خاطر مشاركة