أنا صاحبة مشكلة (إياك تخديه جبر خاطر) وبشكركم جدا على ردكم بس في حاجات حصلت عايزه أقول عنها أنا بعد ردكم قولت إن أنا هسيبه خالص بحجة إن لسه بدري وإن أي حد فينا لو حب في حياته عادي يقول للثاني وخلاص ولو لينا نصيب هيكون وقولته أي ماحبتوش وإني مش عايزه نكلم تاني وفعلا ماكلمناش ثاني وفي الفترة دي الي ماكلمتوش فيها كنت بحس بالحنين ليه ولحنيته بس طبعا كنت بغالط نفسي المهم في الفتره دي اتعرفت على شاب ثاني طالب إنه يتقدم لي وهو شاب مهندس ومركزه كويس ومستواه كويس جدا وكل حاجه وبيحبني طبعا ده الي كنت بحلم بيه وفيه مواصفات الزوج اللي أنا عايزاه وكان وسيم وكل حاجه وفعلا قولته خلاص ناخد فترة تعارف وبعدين يتقدم وفعلا قعدنا حوالي شهرين أو اقل.
الغريبة يا دكتورة إن أنا طول الشهرين دول ماعرفتش أحبه مع أني تصورت أني هحبه فورا لأني قولت هعوز إيه اكتر من كده والغريب اكتر أني كنت بفتكر الشاب الي بعت علشانه قبل كده كتير قوي ماعرفش ليه المهم جه معاد لازم أقرر فيه هكمل مع المهندس ده ولا وصليت استخاره كتير جدا ماعرفش بس لقيتني مش بميله خالص ماعرفش ليه ورفضته الي أنا عايزه أفهمه ازاي دلوقتي إن أنا حاسة إني بحب الأولاني ماعرفش ده حصل ازاي وبسأل نفسي هل ده حب فعلا ولا أنا حبيت حبه ليا؟ طيب وليه ماحبتش التاني مع انه في كل المواصفات الي كنت عايزاها؟ طيب هل تفكيري في الاول ده لمجرد إني محتاجة للحب وبس؟
طيب لو كان حب فعلا ليه ليه مش حب جنوني زي اول تجربه خالص ليا بالعكس ده حب واقعي وعاقل وراكز اكتر بكتير وهل ده الحب فعلا؟ في حاجه كمان أنا مرة صليت استخارة ونمت وحلمت إني بكلمه على النت هل ده معناه إني أوافق عليه؟ أنا عارفه إني تعبت حضرتك جدا بس بجد محتارة ومش عارفه أنا بحبه ولا؟ ولو حب ازاي حبيته؟ مع العلم انه حتى لو كان حب حقيقي فانا قررت إننا مش هنكلم تاني أبدا لغاية مع السنة دي تخلص ويتقدم رسمي بس أنا عايزه أعرف هو حب ولا ليا أنا
وشكرا جدا جدا لحضرتك
وآسفة للإطالة وكل سنه وانتم طيبين وربنا يوفقكم.
13/10/2006
رد المستشار
وأنت بألف خير يا بنتي؛
إذا كنت أنت نفسك غير قادرة على معرفة حقيقة مشاعرك كيف تتوقعين مني أن أحكم على ما يجري بين خافقك وعقلك؟؟ ومن بعيد كمان!!! مهمة صعبة وتكاد تكون مستحيلة ولكني سأعلمك شيئا في الحياة والبشر لا تجري الأمور مثل القواعد في العلوم الطبيعية واحد زائد واحد يساوي اثنين فهنا الأمور أكثر تعقيد، فمع أنك وجدت المهندس الشيك الكلاس المشابه للصورة التي في خيالك لم ينجح في استمالة عواطفك ولعل وجهة النظر الجشطالتية تفسر لك الأمر.
في علم النفس ترى هذه النظرية أن المجموع الكلي –الصورة الكلية- أكبر بكثير من مجموع العناصر في أي موقف أو صورة!! يعني إيه الكلام ده!! هي ترى أن العلاقات بين الأجزاء في الموقف أو الصورة يجعل الصورة العامة أكبر من مجرد مجموع العناصر فالصورة الكلية أكثر شمولية لأنها تضع في اعتبارها هذه العلاقات بين الأجزاء بينما لا يفعل المجموع ذلك.
وتطبيق هذه النظرية على سؤالك تكون الإجابة أن التفاعل بين خصائص الشخص الأول جعله متميزا ومتفوقا كشخص كامل عن الشخص الثاني ولذا بقيت على ميلك لصاحب المجموع الأكبر رغم ضعف أجزائه مثل حسن انسجامه معك أو مشاعر والديك له أو طريقته في التعبير والكلام أو نظرته العامة للحياة كلها قضايا تضاف لمجموع العناصر في الصورة العامة للإنسان بالإضافة لشكله وتخصصه ومستوى دخله وتكون أكثر أهمية في لحظات الحياة الحقيقية.
أما بالنسبة للحب الجنوني فهو غالبا ما يكون مرتبطا بالحاجات الحسية غير المشبعة ولذا فمصيره أن يصل إلى حالة من الاتزان ليصبح عادي وهادي بعد إشباعه، وقد لا تكوني تقصدين الحب الجنوني كما تشير الكلمة بقدر ما تتحدثين عن مشاعر تدغدغك وتوقظك وتفرحك ولكن بالعقل بعيدا عن الجنون وإن لم تستطيعي أن تجدي لها أسبابا مادية فاتخاذ قرار مصيري بناء على النوع الأول أمر غير حكيم. في جميع الأحوال أوافقك على إعطاء نفسك مهلة العام قبل اتخاذ القرار النهائي بخصوص ارتباطك، ولا تنتظري إشارات من السماء كما كان يقول المرحوم د.عبد الوهاب مطاوع ففضل الاستخارة تيسير الأمور مثل إعجاب والديك واقتناعهم لا ما يمليه عقلنا على أحلامنا كما يقول المثل العام "اللي على بال أم... بتحلم فيه بالليل" وأهلا بك ثانية ودائما معنا.
ويتبع>>>>>>>>>>>: إياك تخديه جبر خاطر مشاركة2