إياك تخديه جبر خاطر مشاركة1
أنا حاسة بيكي أوى وعارفه تفكيرك وأنا مريت بحاجة شبهك كده أنا برده كان متأدملى شخص وكان فيه كل المميزات اللي تخليه زوج كويس ويسعدني بس أنا كنت ببأه حاسه أن في حاجة نأصانى في شكله مثلا (مش مالي عيني) مش حاسه أنى هأدر أحبه وكنت بكره حبه ليه وأعد أقارن بينه وبين كل اللي حواليَّ من خطاب صحابي وأرايبي فكنت بلائي نفسي مش مقتنعة بيه ومش شايفة فيه أي ميزة وكمان أنه كان أكبر مني ب 12 سنة وده كان مضايقني أوى مع أن أهلي كانوا مبسوطين بيه أوي وأنا مكانش نفسي أتجوز بطريقة الصالونات دي أصلن فرفضته بعد مشاكل كتيرة أوىىىىىىىىىىى مع ماما.
وبعد فترة كل ما أفتكر القرار اللي أنا أخدته ألائى نفسى سعيدة بيه ومش ندمانة خالص حسيت أنه هم وازاح من على ألبي من كثر كمان إلحاح أهلي أني أوافق و أخدت عهد أنى مش هاتجوز صالونات خالص لأني بكرة الطريقة ديه.
لكن بعد فتره خالي جاب لي عريس برضه بنفس طريقه الصالونات اللي أنا بكرهها ورحت وشوفته وكنت في الأول مش موافقة بعد كده وافقت اقتنعت أن مفيش حد بياخد اللي عايزه بالظبت لكن في نفس الوقت كل واحدة ليها متطلبات مينفعش تتنازل عنها فأنا عايزه أقولك حاجة أنه والله فعلا مش بالشكل مدام فيه توافق بينكم اجتماعيا وماديا وفكريا ومهم أوي تحسي أنك لما بتشوفيه أنك مبسوطة وأنه ممكن يبقى جوزك أنك ممكن تحبيه ومش عيب أنك حاسه أنك بتحبي حبه ليك لأني أنا بدأت أحب خطيبي كده بعد فترة مع العشرة هايجبرك أنك تحبيه من مواقفه وخوفه عليك مش هاتقدرى تزعليه خليكى صريحة معه قولي له أن هوه ألى بأيده يحببك فيه مدام أنت متقبلاه فبالوقت هتحبيه ومدام هو بيحبك هيتقبل منك التناقض (بس لازم طبعا يكون بطريقه حلوة) في شكله وطريقة لبسه اقترحي عليه قولي له أيه رأيك ننزل نجيب لبسك مع بعض أو اقترحي عليه أنة مثلا لو خس شويه يبقى أحسن ومع الوقت أنت هاتغيريه هتلاقيه بقى زى ما أنتى عايزه.
وافتكرى كويس أن محادش بياخد كل ألى عايزه بالضبط وأرضى بنصيبك وصلى استخارة وافتكري أنه في مميزات كثيرة أوى تطغى على عيوب الشكل كفاية أنه إنسان شاريك وبيحبك وصبر عليك ومصمم يعنى إنت عزيزة عنده ادرسي الموضوع كويس وفكري بعقلك وعاطفتك مع بعض.
1/11/2006
رد المستشار
السلام عليكم؛
أهلا بك وبمشاركتك وشكرا على حكمتك الواضحة التي للأسف لم تكتمل, وعلى العموم هو الحلو ما يكملش.
سعيدة بداية أنا بارتباطك بشخص تشعرين معه بالاستقرار والسعادة ويا رب يرزق كل فتيات المسلمين هذا الاستقرار - وشبابهم طبعا- ومن الحكمة أن يرتب الإنسان أولوياته عند الاختيار فهل تفضل شخص حسن الهندام والمظهر وكسول ودلوعة أو كما نقول في العامية ابن مامي؟؟ ألا تشفع للشخص همته وصدق مشاعره في عدم تناسق شكله!! يبقى لها الخيار وإن كنت أرى أن السمات الشخصية أكثر أهمية من المظهر ولكن لا أستطيع أن أفرض وجهة نظري على الآخرين فربما لأن شكلي مش تمام تعلمت أن شكل الناس ليس ذا أهمية وحقا لا أرى أحدا خاليا من جمال فالكمال لله وحده فلا وحش كامل ولا حلو كما اتفقنا كامل.
نأتي لقضية ثقتك بقدرتها على تغييره لو رغبت وأتخيلها نابعة من شعورك واعتزازك بذاتك كأنثى في حالة حب تستشعر قدرتها على إنفاذ رغباتها تدللا على المحب الولهان ولكن هذا الوله ينتهي بعد فترة تطول أو تقصر ويبقى حسن العشرة بين الناس فإن شعر أنها تراه قليلا أو أنه غير قادر على تلبية طلباتها سيزهد فيها هو أيضا لذا لا أنصح بالاعتماد على تأثيرها القوي في البداية فهو قد يكون فعال ولكن دون ضمانات فما يكون الحال إن سايرها بداية ثم تعب ورفض؟؟ أين ستجد نفسها وكيف ستعيش؟؟ ينبغي على الإنسان أن يبني حياته على صخر الواقع وإن كان باردا وقاسيا فهو يبقى ثابت أكثر من نعومة الأحلام. ولعلنا نجد من يشاركنا من المتزوجين والمتزوجات بمجالات نجاحهم في تغيير خياراتهم بعد الزواج لعلنا نستنير وأهلا بك مرة أخرى.
ويتبع>>>>>>>>>>>: إياك تاخديه جبر خاطر مشاركة3