بحبه... بس

حب من طرف واحد..!؟

السلام عليكم؛
بداية لا أجد أي كلمات تعبر عن شكري بموقعكم الرائع الذي استفدت منه كثيرا وأفادتني استشاراتكم وكيف ألجأ إليه في أصعب المواقف.
أتمنى من الله عز وجل أن تكوني سبب في حل مشكلتي فهي تؤثر على حياتي بشكل كبير جدا جدا وعلى تركيزي واتخاذ قراراتي.
سأقول أولا نبذة عن نفسي، أنا فتاة على مشارف ال 27 الحمد لله أعيش في أسرة والدتي متوفية ولدي من الأخوان الذكور 2 وعلاقتنا ببعضنا كأسرة جيدة جدا، نشأت في وسط متدين ولله الحمد.

خلال مراحل حياتي لم أكن أختلط بالجنس الآخر تمام ولا في ثانوي ولا في الكلية, الاختلاط بدأ لما اشتغلت وبرده بدأ واحدة واحدة ولكن لازلت محافظة على وجود مسافة مناسبة وحدود لا يمكن تعديها.

اتخطبت مرة واحدة لشاب ملتزم وأنا عندي 19 سنة وكان تقليدي جدا وللأسف لم أحبه ولم أشعر بأي مشاعر وعشت في مشاكل ما يقرب ال 7 شهور أثرت جدا على نفسيتي وتم بعدها فسخ الخطوبة... بعدها ب 4 سنوات قرأت فاتحة فقط لشاب أيضا عن طريق الجواز التقليدي ولم تكمل إلا شهر فقط وأحمد الله على ذلك، بس برده ده أثر في شوية.
بعدها اشتغلت في مكان مرموق الحمد لله وتفوقت في مجال عملي وكان ليا زمايل ولاد وبنات عادي.

بداية الــــــمــــشــــكلة:
في بداية شهر 4 -3013، جالنا سوبرفايزر جديد وهي دي المصيبة اللي أنا فيها دلوقت أنا للأسف أعجبت بهذا الشخص من قبل ما أشوفه لأن الناس دايما كانت بتتكلم عنه أنه شديد في الشغل ومتدين أوي وأنا بحب هذا النوع ومن أول ما شوفته أنا أعجبت بيه لأني أصلا مسبقا أنا أعجبت بيه، ودارت الأيام وطبعا بطبيعة الشغل معاه عرفت أنه مش متجوز وأنه يبلغ من العمر 39 سنة طبعا زاد إعجابي بيه أكتر ولم أعير انتباها لفرق السن، وبعدها جربت يعني إيه مشاعر الحب اللي عمري ما عرفتها.... هذا الشخص هو يتبع الفكر السلفي وهو ملتحي بس في نفس الوقت إنسان مرح لدرجة أني اتصدمت أنه بيهزر مع بنات عادي وبيكلمهم على الفيس عادي، مش كلام وحش ولا حاجة بس يعني المفروض محدش ملتزم يعمل كده.

أثناء هذه الفترة حاولت أن أوضح بطرق غير مباشرة أني لا يهمني فرق السن في زوجي المستقبلي وكمان أنا أريده متدين وهكذا وحسيت للحظة أنه بدأ ينتبه لي لما قلته أنه اتقدملى حد يكبرني ب 12 سنة وده فعلا حصل بس من فترة، بس أنا حاولت أقولها علشان أعرفه إن أنا ما يهمنيش فرق السن، وبعد كده الحياة مشيت عادي مافيش أي مبادرات.

المهم جيت في مرة الشغل وأنا أرتدي عباية سوداء لأني بعدها رحت درس القرآن في هذا الوقت بصلي جامد واتلخبط وسألني إنت عملتي إيه امبارح وكده!! وبعدها بيوم كان بيبص علي ويشوف ردود أفعالي وكأنه كان بيفكر مش عارفة أوضحلكوا إزاي بس كأنه بدأ يفكر "ليه لأ"، طبعا أنا فرحت بعدها جدا لأني حسيت أنه بدأ يفكر في وبدأت أبني قصور على الرمال، قصور من الخيال أنه ممكن يكون من نصيبي وبعدها بأسبوع رجع تاني هو عادي وأنا مازلت في ضلالي.

أنا طبعا مش عارفة أحكيلكوا كل حاجة بس أنا عملت حاجات كتير أوي غير مباشرة أحاول أعبرله بيها أني معجبة بأخلاقه وأتمنى يكون زوجي، الحاجات دي مش مبادرات مني أوي، بس بيكون كلام بطريقة معينة وقبل ما يتنقل لفرع تاني.. أنا جبتله هدية (ورغم إن دي حاجة ممكن تكون عادية في الشغل لما حد بيمشي بس دي حاجة أنا تضايقت من نفسي منها جدا، المهم جبتله الهدية وقلتله أصل حضرتك عزيز علي يا أ....).

المصيبة:
المصيبة فعلا إن بالعقل هذا الشخص لا يناسبني مش علشان السن لأ، لأن طباعه فيها غلظة وبالنسبة له النساء ليس لهم رأي وعلى فكرة هو خطب 3 مرات قبل كده وفسخ وبيتقدم لبنات كتير جدا جدا، طبعا معرفش تفاصيل أوي، والمصيبة بقى إني بحبه جدا جدا جدا وبعيط كتيير إني نفسي أتخلص من الإحساس ده، أنا بحبه وفي نفس الوقت أنا متغاظة منه إنه مش حاسس بيه، وبرغم كده أنا نفسي أخوض التجربة معاه نفسي نفسي يحس بيه.

أنا في دوامة مش عارفة أطلع منها، نفسي في خطوات عملية أفوق من اللي أنا فيه ده
أنا راجعت طبيب نفسي وكتب لي على دواء topmode - neurovit، اتحسنت لفترة لكن رجعت تاني زي الأول، إحنا كلامنا حاليا بسيط لأنه انتقل فرع تاني، بس أنا مازلت أفكر فيه، وبقعد أقول لو كنت جميلة أكتر كان زمانه أخد باله مني، وفقدت الثقة بنفسي، يعني أنا واحدة أصغر منك ب 13 سنة ومن عيلة كويسة وشغالة في مكان كويس وكمان بتحبك وللعلم أنا متخرجة من كلية علمية كمان، طب ليه مفكرش فيه؟؟؟؟ يعني في راجل في سنه يطول بنت موافقة عليه وهو أكبر منها ب13 وكمان بتحبه ومتطلباتها مش كتير من مهر وشبكة؟؟

الـــــــــــحـــــــــــــــل:
أنا دلوقتي نفسي في حل عملي وخطوات عملية أن أنسى هذا الشخص أنا ثقتي في نفسي بقت مهزوزة وحاسة أني صعب ألاقي حد يحبني، صعب أني أعيش إحساس بالقوة دي مع حد تاني، نفسي أقطع أي أمل أنه ممكن يحس بيه، أنا مشكلتي إني ساعات بدي لنفسي الأمل إنه ممكن يحس بيه وبقول مافيش حاجة بعيد عن ربنا، بس ده غباء مني.
أعذروني لأني كلامي مش مرتب وأعذروني أكتر إني مش عارفة أوصف إحساس الحرقة اللي في قلبي، بشكركم جدا.

28/11/2013