سلاح الحب هو الأقوى ودواء الحب هو الأنجع

السلام عليكم ورحمة الله
R03;
أنا امرأة أعشق زوجي من أول ما لمحته عيني وهو بيتعرف بي وأنا اعتبرته بيني وبين نفسي رجلي وإلى الآن. طوال فترة الخطوبة مكنتش بشوفه بعقلي دايما بقلبي، وده كان بيخليني أتغاضى عن التصرفات غير اللائقة من عيلته. كان دايماً عذري لنفسي أنه بيحبني ومش بيضايقني، عرف يوهمني أنه هو كمان بيحبني. زوجي أزهري وتعليم عالي ومستواه الثقافي ممتاز معروف في وسط الناس بقوة الشخصية والتدين وأنا فتاة عقلانية جداً (إلا مع زوجي) تعليمي عالي ومتدينة ومستواي الثقافي مناسب ومجتهدة على الصعيد العلمي والعملي.

أول أسبوعين في الزواج كنت عيشاهم في الجنة من أول ساعات بيني وبينه في بيتنا عرفت أن اختياري ليه صح وإنه الأمان والحب والطيبة، لكن من الأسبوع الثالث ومع خلاف بسيط مكنش يستاهل ضربني وآذاني كسرني بيني وبين نفسي ونزع من جوايا الأمان اللي حسيته معاه حسيته مش بني آدم حسيته وحش شرس قاسي. حاول أنه يراضيني كتير يومها لكن أنا كنت في ثورة غضب منه. ومن يومها مسمحتوش على أي شيء عمله فيا.

من وقتها وكل شيء اتهد وبدأت تظهر شخصية معرفهاش. وجدت زوجي سادي بيتلذذ أنه يضربني وقت العلاقة وكأنه بينتظر اللحظة التي يلمح فيها خوفي منه كان يهددني إن صوتي لو علا هيضربني. وفي مرة قالي هربطك وأعذبك لكن معملهاش. وطبعاً في الفترة دي كان فيه خناقات طول الوقت وكنا في رمضان ولاحظت عيلته أننا مش على وفاق لأننا كنا ساكنين في نفس البيت معاهم وطبعاً تدخلوا وهم مش فاهمين حاجة ولا أنا أستجري أقول حاجة والدنيا اتلخبطت لأن قصاد تدخلات أهله وحالتي النفسية الصعبة دخلت والدي في الموضوع ومعرفتوش غير أنه ضربني وأهله بيتحشروا وبس.

طبعاً والدي كان فاكر إن الخلاف بسيط فشد علي وراضى جوزي اللي هو أصلاً ظالمني، وقدرت في الفترة دي أبطله حكاية ضربي وقت العلاقة لكن مشاكلنا كانت نار طول الوقت، ودخل في سكة تانية إلى الآن مستمر فيها وهي إجباري على خيالاته الجنسية. بدأت بأنه بس شايف أنها إثارة ونفوري منها خلاه يدعي أنه بيحب يشوف غيرتي وبعدها يتحجج بإنه بيغظني لحد متأكدت أن خياله ده مش راجع لأي سبب من اللي قاله لي ولكن راجع لأن دي رغباته الحقيقية لما لقيته متابع صفحات إباحية بتحمل نفس أفكاره بالظبط.

زوجي بيفكر في كل حاجة غريبة، بيفكر في جسم أختي وأقاربي وأصدقائي وبعض من أقربائه في الغالب بيكونوا متزوجين من الآخر بيفكر في محارم ومحصنات، ومحاولاته المستمرة أنه يقيم معايا علاقة من الدبر (قدر ينفذها مرة واحدة باقي المرات إما بيتراجع من نفسه لأنه حرام أو إنه بيشوف خوفي من إنه يعملها). ده غير العواجيز والتخان والمنتقبات، وعلاقات فيها عنف ربط حبال وضرب. والأدهى واللي أنا شايفاه مسيطر عليه الفترة دي اللواط. هو مش بيكتفي بإنه بيفكر في ده لا عاوز يجبرني أتكلم فيه وأحكيه وأوصفله الأجسام والعلاقة إزاي وأرسم سيناريو للموضوع كمان. طبعاً ده كله بتجبر عليه ساعات بقدر أقاوم وساعات لا.

بعد جوازي بشهرين حملت وحملي كان كله تعب وقرف من كل حاجة والمشاكل مش بتقف وهو مش بيرحم وأنا معتش مستحملة، لحد آخر مرة في عز تعبي وكان حملي يدوبك شهر ونص وبتألم من وجع الضهر ونفوري من الأكل اتخانقنا وضربني ضرب مبرح جسمي كله أزرق وكنت خلاص هي دي النهاية بجد سبته ومشيت مع أبويا على إني هرجع بعد يومين وطبعاً والدي ميعرفش حاجة غير الضرب والذي كان متصورا إنه يا دوبك بيخبط كتفي واتفاجئ لما روحت إن جسمي متزرق ومتشوه وإنه سبني وأهاني.

طبعاً سبت البيت بالطقم الذي علي وأجبرني أسيب شبكتي، مكملتش 48 ساعة عند والدي وحصلي نزيف وفضلت شهر ونص بعدها بتعالج عشان مخسرش الجنين، وطبعاً زوجي ولا هو هنا ولا كلف نفسه يسأل، بس كان يتصل عشان يتخانق ومع كل خناقة أنا اللي أتعب والنزيف يستمر، وطبعاً من وقت للتاني عاوزني أرجع البيت وأجي لوحدي من غير محد يوصلني وطبعاً مكنش ممكن إن ده يحصل أولاً بنزف وممنوعة من الحركة وكنت خايفة إنه يسقطني في لحظة غضب.

أنا حاولت مرة إني أرجع اتصلت به وأنا عند الدكتورة إنه يجيء لي بس هو مردش عليّ، ورجعت لبيت بابا. طلع علي عيوب الدنيا هو وأهله، ووصل الموضوع إنه عاوز يطلقني. الوقت كان بالنسبه ليه ضيق لأنه كان مسافر فمطلقنيش لأنه عاوزني أتنازل عن حقوقي وأنا بلغت أهلي إني برفض لأنه حق اللي في بطني. محدش من أهلي جبرني على شيء. سافر جوزي وطبعاً خبي علينا إنه سافر وسلط عليّ إخواته إنه اتجوز غيري وإنه بيتفسح مع اللي قلبه اختارها وكلام كذب إني بوقع بينهم وإنهم هياخدوا مني ابنى وإنه هيطلع معاق لأني أمه معدومة الأخلاق والدين والضمير.

طبعاً أنا عند أهلي من حوالي 5 شهور وزوجي لا سأل عني ولا عن البيبي ولا صرف علينا مليم (أنا لاحظت إنه بخيل معايا أنا بس) ورفض حتى يبعث لي هدومي. بعد سفره بشهر بدأ يظهر ويتكلم في طلاق وإنه بينفذ رغبتي لأنه لما كان بيضربني كنت في غضبي بطلب منه الطلاق وطول الوقت استفزاز، وعشان خاطر اللي في بطني فهمته إني طلبي للطلاق كان وقت أذيته ليا وإن مشاكلنا لازم تتحل وهو مصمم إنه تجوز، لحد معرفته إني واثقة أنه سافر وأنه مش متزوج بغيري، ولما ملقاش فايدة من الكذبة دي سكت، وبدأ كل فترة يكلمني مرة وطبعاً يتخانق. رجعلي بقاله شهر يكلمني مرة في الأسبوع، وطبعاً مش عشان يطمن علينا لا عشان يجبرني أتكلم في شذوذه، بقي بيجبرني على ده.

غصبن عني بقيت مستسلمه إني أشاركه الكلام، وهو بقي فاكر إني مستمتعة بيه وإني عندي رغبة إني أتكلم في اللواط وزنا المحارم وعلاقات جنسية جماعية أكون أنا وهو أطراف فيها. أنا مش قادرة أستمر على ده أنا شايفة إنه غلط وحرام، وفي نفس الوقت خايفة أبقي زي جوزي مستمتعه بيه، ولو رفضت خايفة أدمر مستقبل البيبي اللي لسه مخرجش للدنيا. أنا كل حلمي بيت صغير، زوج وزوجة سعداء يكونوا أب وأم قدوة لأولادهم، مش قادرة استحمل إن الرجل الوحيد اللي حبيته وبحبه يكون سبب دماري أنا واللي في بطني.

نفسي الدنيا تتصلح ونبقي بيت جميل. من حق ابني يخرج للدنيا يلاقي أبوه وأمه بيراعوه. خايفة لو اتطلقنا من حساب ابني لي إني مستحملتش عشانه وإني فاشلة.
خايفة مقدرش أكون أم وأب لابني.
خايفة إن زوجي يطلقني ويحاول ياخده مني لأنه هددني بده قبل كده. قالي هاخده وقتها سخرت منه وقلتله ابني جوه رحمي ربنا حافظه جوايا ولما يخرج للدنيا هيبقي في حضني إزاي أنت تقدر تاخده قالي إنت متعرفنيش أنا عرف بلطجية وصيع.

أنا خايفة من مستقبلي المجهول، أعمل إيه؟ ممكن يؤذيني لو قلتله يروح لطبيب، ولو استمريت على هواه أنا من جوايا بتشوه، ولو سبته أنا وابني مستقبلنا هيكون فيه إيه.
05/02/2015