وسواس انتقال النجاسة من القمة إلى طظ! م

 وسواس انتقال النجاسة من القمة إلى طظ!
 سلس البول الإلحاحي وتنقيط البول أثناء الاستنجاء
 
السلام عليكم ورحمة الله وكل سنة وأنتم طيبين بمناسبة رمضان ورمضان كريم عليكم وعلى كل الأمة الإسلامية وأرجو الدعاء لي بالشفاء في الأيام المباركة دي
 
أرجو أنكم تردوا على أسئلتي ومتحولونيش لاستشارات تانية أنا قرأت الموقع كله ثلاثين مرة أنا عاوزة حد يكلمني ويرد عليَّ أنا وآسفة لو هتعبكوا بس حياتي اتحولت لجحيم وبقيت بأتمنى الموت الحياة ملهاش طعم ولا معنى بالنسبة لي عايشة عشان اليوم يخلص وبس بأستنى الليل ييجي عشان اليوم يخلص .
 
المهم أنا عندي وسواس انتقال النجاسة ووصل مرحلة صعبة بقيت حساسة لأقل أقل التفاصيل اللي محدش بياخد باله منها أبدا حتى مش بيفهموها أوي أما بشرحها ومع ذلك بقيت بحاول أتجاهل كتير وبقيت بجاهد إني معملش أعمال وسواسية وأتجاهل ونجحت في حاجات كتير
 
مشكلتي اللي مش عارفة أتجاهلها هي وسواس تنقيط البول أنا جالي سلس بول إلحاحي أنا قرأت عنه بس الحقيقة مروحتش لدكاترة وهو فجأة أحس إني عاوزة أدخل الحمام وفجأة أتزنق جدا وفجأة ينزل نقاط بول وده مش وسواس أنا بشوف البول بعيني وبيحصلي أما بتوتر أو أفكر في الموضوع وبحسه بعض الأوقات ليه علاقة بأماكن في البيت اللي بتسببلي توتر زي الحمام وغرفة معينة بغير فيها لابني الحفاض بس مش دايما بينزل بول ساعات بسترخي وآخد نفس كده بقدر أمسك نفسي والبول مش بينزل طول اليوم الحمد لله ولا كل مرة أتزنق فيها بس مشكلتي في الشك أثناء الاستنجاء بحس إن بينزل بول وكل ما أخلص استنجاء أبدأ من الأول تاني بسبب إحساسي إن نزل بول
 
أنا مش متأكدة وعارفة إن مادام مش متأكدة يبقى الأصل الطهارة بس مش عارفة أطبق الكلام ده بضغط جامد وبحس إن نقطه البول اختلطت بماء الاستنجاء وانتشرت في كل مكان مش مجرد في المنتصف وخلاص فممكن ألبس فوطة صحية وخلاص لا بحس بالانتشار فأرجع أستنجي تاني وهكذا وطبعا سلسل البول المتقطع اللي عندي ده هو سبب الشك بقول لنفسي ما ممكن نزل وإنت مش حاسة ولا قادرة تمسكي نفسك بسبب مياه الاستنجاء
 
هل فيه علاج لسلس البول اللإلحاحي ده ولا هو مرتبط بالوسواس بسبب التوتر ومحتاجة أهدى شوية أنا شكيت إن الأدوية السبب ووقفتها للأسف عشان قرأت أنها بتعمل سلس بول وأما وقفتها السلس خف شوية بس مراحش لسة موجود فمش عارفة الأدوية فعلا السبب ولا عامل مساعد زود مش أكتر
 
 ونفترض إن بينزل نقط بول طيب بعد الاستنجاء كل مرة إيه اللي المفروض أعمله مع إحساسي بانتشار النجاسة في المكان إيه الحكم الشرعي حتى
 
وعندي مشكلة تانية وهي تغيير الحفاض لابني بقيت بتوسوس مع كل مرة أغير له بحس إن عند التغيير المكان بيبقى رطب شوية والحفاض بيتغير مكانه يعني مكان الأستيك من عند الفخد فبالتالي المكان الرطب هييجي عالأستيك والأستيك بيتعرض لملابس الطفل وساعات الحفاض بيتحرك عند التغيير بحسه بيلمس يمين وشمال العانة بينقل النجاسة لمكان برضو بيتعرض لملابس الطفل وبعض الأوقات الحفاض بيتملي فالبول بيوصل لجوانب الحفاض وبعدين الحفاض يتحرك للداخل شوية فالمكان اللي كان فيه البول بيتعرض للملابس وبعض الأوقات الطفل بيسكب مايه يقعد عليها وملابسه بتتبل أو يعرق فينقل النجاسة اللي عند الفخد أما الحفاض تحرك
 
يعني عندي وساوس كتير أوي من موضوع الحفاض ده مش عارفة أتجاوزها للأسف ولا عارفة إيه حكمها
خصوصا بقول ما كل الأطفال أكيد كدة مش ابني لوحدي
10/3/2025