|
| 
|
مش عارفة!
دكتور أنا مش عارفة أبدأ منين بالضبط وكمان مش عارفة أحدد المشكلة أصلا (وهكتب بالعامية لأني مش متعودة أكتب فصحى) بس حياتي متلخبطة كلها على بعض كده اللي خلاني أكتب دلوقتي إني مش قادرة أبذل حتى المجهود الطبيعي اللي باقي زمايلي بيعملوه، أنا امتياز بشري جديد والمفروض أبقى أنشط من كده وأسعى للتعليم بس معرفش بتصرف كده ليه.
بتخنق جدا جدا لما أقوم كل يوم الصبح عشان أروح نفس المكان وأقابل نفس الناس اللي أصلا مش حباهم بتخنق أوي من إلزامي بإمضاء حضور وانصراف وبحس إني مقيدة وعاوزة أمشي، أنا كده من أيام ثانوي وطول الجامعة كنت بحضر بمزاجي وبس وغير الإمضاء كمان نفسيا مزاجي متقلب جدا أيام اكتئاب من غير سبب وأيام عادي طبيعية وكتير ملل ودايما أعدادنا كبيرة في المستشفى الجامعي اللي أنا فيها ولما بلاقي كده بردو بتخنق وأمشي ومتعلمتش حاجة لسه كأني في سوق مش مستشفى وبجد اتخنقت.
وقبل كده كنت بقول إني هقرأ كل يوم في الامتياز، ماقرأتش حاجة، بحس إنه لما يبقى لازم أعمل حاجة بأتعمد إني ما أعملهاش وبتخنق وبهرب منها، حاسة إني عاوزة أعيش من غير التزامات حتى الدينية لأني أيام متدينة وشهور لا وأصلا مابقتش حابة إني أبقى متدينة بقالي كتير مابصليش وبقيت أفكر بطريقة شهوانية طول الوقت بحس إني عاوزة أعيش حياة الفوضى وفي نفس الوقت بجد بجد لما بتبقى فوضى كده بتضايق جدا جدا ممكن أقول تعبير تاني غير فوضى,
حاسة إني عاوزة أعمل كل حاجة بمزاجي وقت ما أحب واللي مش عاوزاه ما أعملوش ومحدش يلزمني بحاجة, على فكرة أنا سعات بروح يوم الأجازة اللي هو السبت عشان أنا حابة كده وعشان مش مفروض علي حاجة وبحس بتغيير وإني مبسوطة وأنا رايحة في معاد غير المعتاد يعني بعد الظهر مثلا بفضل الحجات اللي بستمتع بيها على الحجات المهمة يعني بحب آكل وأتفرج على التليفزيون والنت وأي حاجة فيها متعة ومافيهاش شغل
وكمان في مشكلة ثقة بالنفس, الأول كنت بشوف الناس كلها أحسن مني وكله صح ماعدا أنا, بعدين بقيت أشوف إن كله غلط كل الناس غلط, وحاليا كتير بشوف مميزات الناس وعيوبي أنا وسعات برجع للفكرة الأولى إن كلهم صح وكلهم عارفين طريقهم (على الأقل في محيطي زي زمايلي مثلا) وأنا لا وبحس إني مش عارفة عاوزة إيه بالضبط وعايزة حد دايما يقولي خطواتي عشان أتعلم أو المفروض أعمل إيه ويوجهني وغالبا مش بلاقيه عشان كده علطول في عشوائية وتخبط.
ودلوقتي محتارة طبعا في موضوع التخصص، مش قادرة أعرف أنا عايزة إيه مش بحب الناس مع إني دايما زعلانة إني لوحدي ومليش صحاب أصلا بتعامل مع الناس حسب مودي ولي صاحبة واحدة مفروضة علي بحكم المكان وكتير بكون مخنوقة من طريقتها الباردة الهادية الثابتة كل يوم وبغير جدا وأنانية سعات وسعات العكس تماما يعني سعات أحس إن كل الناس محتاجة ومفتقدة الحنان وأنهم صعبانين علي أو أننا كلنا صعبانين علي لأننا كلنا عندنا مشاكل وتعبانين!
معنديش طاقة نفسية إني أحقق الهدف اللي دخلت عشانه الكلية دي، أنا دخلتها بإرادتي بس حاسة إني تدبست ماكنتش فاهمة حاجة وحاسة إن كل سنة عدت علي في الكلية كانت بتكسر أو بتدمر جوايا حاجة، بجد حاسة كده إني مبقتش طبيعية وكارهة كل حاجة أنا لقيت الكلام ده في موقعكم في موضوع أنواع الاضطرابات الشخصية وده مكنتش عارفة أصيغه، أنا كده فعلا بجد بس مش فاهمة إيه بوردرلاين يعني، بين إيه وإيه يعني؟؟؟؟؟
الشخصية الحدية (البين بينية) Borderline Personality
0 تتميز بعدم استقرار في العلاقات الإنسانية، وعدم ثبات صورة الذات وعدم استقرار في الانفعالات مع اندفاعية شديدة.
0 يبذل مجهودا كبيرا لتجنب مشاعر الهجر سواء حقيقية أم متخيلة.
0 العلاقات الإنسانية غير مستقرة وتتميز بالتذبذب بين إصباغ الكمال على الآخر وتحقيره.
0 اضطراب الهوية مع عدم استقرار صورة الذات.
0 اندفاعية تظهر في مسألتين على الأقل: (الإسراف - الجنس - تعاطي المخدرات - القيادة المستهترة - نوبات النهم في الأكل).
0 محاولات انتحارية متكررة أو تهديد بذلك أو سلوك يشوه به جسمه.
0 عدم استقرار انفعالي يظهر من خلال (اعتلال مزاجي شديد، سهولة الاستثارة، نوبات قلق شديد) تستمر لساعات فقط ونادراً لعدة أيام.
0 إحساس مزمن بالفراغ.
0 غضب شديد وغير مناسب للموقف مع صعوبة في التحكم فيه .
0 أفكار اضطهادية عابرة ومرتبطة بأوقات الاضطهاد والقلق، أو أعراض هستيرية شديدة.
وكمان الكلام ده في بعضه.. بس المواقف اللي تتطلب مغامرة دي أحيانا بتتجرأ جدا وأحيانا بخاف جدا جدا أنا بجد هتجنن، أنا قريت الكلام ده بردو في موضوع وحاسة أنه في ((أعتقد أنك محتاج لمساعدة نفسية مباشرة كي تستطيع التعبير عن نفسك أكثر وتتعلم بالطرق السلوكية والمعرفية كيفية التخلص من أعراض الشخصية المعادية للمجتمع والتي أهم ما يميزها عدم قدرتها على تحمل الإحباط والاستسلام لكل النزوات)), هو أنا في ده كله إزاي بالنسبة لطريقة تربيتي فهو حضرتك تقدر تقول كده إني اتربيت بشكل تلقائي علمت نفسي بنفسي على أد ماعرفت بيتنا ده مش بيت تقريبا أب وأم اتجوزوا من غير رضا أهلهم مش متوافقين ثقافيا أبويا مش متعلم وأمي ثانوية عامة علشان كده مفيش أي مبادىء في بيتنا؛
ودلوقتي هو متجوز 2 ومخلف أكتر من إخواتي اللي من أمي ومعرفش منهم إلا ولد واحد أخويا آخد إعدادي ودخل ثانوي صناعي ومكملوش، وأمي جوزته لما بقى 18 سنة، دلوقتي هو 21 وتقريبا بقى معقد وبيكره أمي لأنه علطول بيشتمها ويتخانق معاها وأخويا التاني ماشي في نفس الطريق ومابيروحش المدرسة، أنا وأختي بس اللي في كليات والحقيقة أنا بقعد أستغرب على دخولي الكلية دي أصلا بس أنا كنت في ثانوي معرفش حاجة في حياتي إلا المذاكرة ومكانش عندي نت.
أنا قولت الكلام ده كخلفية يعني لطريقة تربيتي أنا مبقتش عارفة أنا عايشة ليه وتعبانة أوي, بقوم الصبح كل يوم مش عاوزة أقوم ومش عارفة أنا قايمة ليه وله المفروض أعمل إيه ولا عارفة أنا اتخلقت ليه.
الدين بيقول إن ربنا خلقنا عشان نعبده، طب هو مش محتاج ده أصلا، خلق ناس من غير إرادة ليهم في وجودهم وكلفهم بحجات ملهومش بردو إرادة فيها، يعني أنا مثلا لو اتسألت أنا عايزة آجي الدنيا أم لا كنت هقول لا، أنا مش حابة أكون هنا أنا مش عارفة هدف وجودي إيه وأكيد طبعا مش عارفة أعيش حياتي ولا أحط أهداف لأني مش عارفة ده كله آخرتها إيه وليه أي إنسان المفروض إن نشاطاته وحياته بتكون بناء على مبادىء ومعتقدات وأفكار في دماغه.
الكارثة أني معنديش أي حاجة من دول وحاسة إني عايشة في وهم وضياع أو عايشة في تخبط وتلقائية غبية, بضيع الوقت وبس في أي حاجة غبية ومش حاسة بطعم أي حاجة في الحياة ومش فاهمة فيها حاجة مفاهيمي مختلة بخصوص حجات كتير زي الحب والعلاقات الإنسانية وده حاصل من سنين بس كنت 21 سنة وكنت بقول ده طبيعي إني أبقى متلخبطة لأن مرحلة العشرينات كده بتبتدي تحدد ملامح الشخصية بس أنا 23 ومفيش تغيير إلا للأسوأ عايشة في حالة فراغ روحي يعني مفيش روحانيات دينية مفيش صداقة مفيش حب مفيش هواية مفيش أي حاجة
طبعا طريقة صياغة الرسالة غبية بس مش قادرة أكتب أحسن من كده دلوقتي.
بانتظار ردكم ومع الشكر
25/04/2013
رد المستشار
صراع وجودي بدون حل Unresolved Existential Conflict :
هذه الاستشارة للأخت الكريمة تكاد تكون نموذجاً للغز الذي يواجه الطبيب النفسي أحياناً في فحص ودراسة بعض الحالات.
من السهولة تشخيص اضطراب اكتئابي من خلال قراءة الرسالة, ملاحظة الإشارة إلى الشعور بالاكتئاب، تقلب المزاج، ضعف الاندفاع، انعدام الثقة بالنفس، والأهم من ذلك فقدان القابلية على الشعور بالبهجة على ضوء ذلك يستحسن وصف عقار مضاد للاكتئاب والأفضل هو عقار السترالين Sertraline بجرعة 50 – 100 مغم يومياً.
تتحدث الاستشارة أيضاً عن التاريخ العائلي والفردي لمستخدمة الموقع هناك أزمة في عدم وضوح معنى الوجود من خلال انتقادها الصريح لسيرة العائلة هذا المعنى لوجود الإنسان ونضاله في الحياة لم يتم الفصل به ومن جراء ذلك تكافح من أجل الاقتناع بالقواعد الدينية، نظرتها للعلاقات الاجتماعية، افتخارها بالمهنة، ووضع الخطوط العريضة للمستقبل.
يتعرض الإنسان لضغوط بيئية متعددة تؤدي إلى الاكتئاب أحياناً تبدو هذه الضغوط طفيفة ولا معنى لها لبعض الأفراد في هذه الحالة تشير الأخت إلى حيرتها في الاختصاص بل وحتى معناه هذا الحدث مع قرب انتقالها إلى عصر جديد في حياتها يتوازى مع أزمة أو عقدة معنى الوجود في حياتها والتي تسببت في ظهور الاكتئاب.
التوصيات Recommendations
* شكراً على استعمالك الموقع.
* ابتعدي عن التفكير باضطراب الشخصية ليس هناك في رسالتك ما يشير إلى أنك مصابة بهذه الاضطرابات إن كانت هناك بعض الصفات التي من السهل لصقها ببعض الأفراد، لكنها لم تصل إلى حد تشخيص اضطرابات الشخصية.
* نوبات الاضطراب تختلف من إنسان إلى آخر ونصيحتي لك باستشارة أحد الأطباء وتسلم العلاج تحت إشرافه.
* أشرت في الرسالة إلى أزمة معنى الوجود التي لها علاقة مباشرة بالاكتئاب الذي تعانين منه أعراض الاكتئاب تختلف من إنسان إلى آخر والكثير يفلح في مقاومته لفترة زمنية محدودة ليس هناك ضرراً في معالجة طبية وتناول السترالين أو غيره مع الكلام مع معالج نفسي.
وفقك الله.
تعليقات الأعضاء