وسواس قهري أم ماذا؟
السلام عليكم، أرجو في البداية أن معلوماتي تكون مخفية وشكراً.. بقالي فترة طويلة بدخل موقعكم كل ما يجيئ لي وسواس في حاجة والحمد الله بيروح مع الوقت، مشكلتي بدأت تقريباً من السنة التي فاتت لما بدأت أحس بخنقة بدون أي سبب ورغبة في البكاء رغم أن مفيش أي حاجة تحزن أو تضايق، كنت طول الوقت حاسة أني مخنوقة وطول الوقت بعيط وقعدت بالحالة دي لمدة شهرين تقريباً وتحسنت.
بس المشكلة إني بدأت أحس أن الدنيا دي وهم وأن الناس اللي حوالي مش موجودين أصلا وبسأل نفسي إزاي أثبت أنهم موجودين وأنهم فعلا زيي زيهم بيحسوا وناس حقيقية فيها روح، الوسواس ده راح مع الوقت بردو
ومع البحث الكثير أقنعت نفسي أنها أفكار غبية ملهاش لازمة وأني لازم أتجاهلها، بعدها بكام شهر جاء لي وسواس أني شاذة جنسياً والعياذ بالله وراح ورجع وفضل فترة طويلة لحد ما قرأت عنه هنا كثيرا وتفرجت على فيديوهات أجنبية وعربية على أنه مرض وأفكار قهرية بتيجي وأني مش كده بجد، فضل بتاع خمس شهور بيروح ويجي والحمد لله بردو راح زي اللي قبله.
بعدها بفترة مش كبيرة بعد ما بدأت ألتزم في الصلاة والصيام جاء لي وسواس في العقيدة بتاعتي وبقيت بحس نفسي كافرة وبسأل عن ربنا كثير وبسأل أسئلة وجودية وأسئلة كبيرة أوي كانت بتخلي عقلي يخاف ويتخض وبسأل عن المسيحيين واليهود ومن الذي على دين الحق ومن على باطل لحد الحمد الله ما ربنا هداني والأفكار دي مشيت.
بعدها مات أحد أعرفه بسبب جلطة في المخ -ربنا يرحمه يارب- وهو كان شاب صغير جداً وبدأ يجيء لي وسواس الموت وأن أي أحد قريب مني هيموت فجأة لا قدر الله أو أني نفسي هموت فجأة لا قدر الله وبقيت أسأل نفسي أن الدنيا دي مش مستاهلة وأننا كده كده هنموت فليه منموتش مرة واحدة والعياذ بالله وأفكار مستفزة قعدت بها أسبوعين أو أكثر.
جاءت لي بعدها وألهتني وسواس أن كل حاجة حوالي حرام وأني كل حاجة بعملها حرام وكل ما أسمع مثلا حد بيضحك بره أول فكرة تيجي في دماغي ده حرام، لما بسمع صوت عربية بقول حرام بدون وعي لحد ما بقيت بحلل كل حاجة وكل كلام بقوله على أنه حرام زي مثلا لما آجي أهزر مع حد بقول لنفسي أنا كذابة أو أنا بقول كلام حرام أو أن ربنا بيكتب لي ذنوب، وبقيت لما أقرأ سورة الإخلاص مثلا أقول لنفسي ربنا دلوقتي غضبان علي وبيكتب لي ذنوب!!
دلوقتي في الفترة دي عندي وسواس من ناحية الأغاني والموسيقى أو أي حاجة فيها خلاف إذا كانت حرام ولا حلال وبتخض وبقيت بصحى مخضوضة كل شوية وأول كلمة تيجي في دماغي الأغاني حرام! الموسيقى حرام! كلاكس العربية حرام!
بفضل أعيط ومبعرفش أنام ساعة على بعض في اليوم وأفضل أسأل شيوخ ودار الإفتاء المصرية والأزهر الشريف ويقولون لي كذا فتوى وأرجع أشكك ثاني وأقول ما يمكن كذا وأرجع أدور تاني وأسألهم ثاني ويفتون لي فتوة أقتنع بها بعد كده أشك في نفسي وأخاف وأحس أني بعمل ذنب وأدور على النت في كل حتة على أحكام كل حاجة بعملها وبالذات الحاجات التي عليها خلاف كأني بصمم أني أخوف نفسي، مع أن في حاجات أصلا ملهاش علاقة بي ولا أنا ناوية أعملها أو أحد من قرايبي عملها.
عندي فزع شديد ونفسي أرجع لحياتي الطبيعية التي كنت فيها أصلي وأصوم وأعبد ربنا من غير ما أفضل أشك في كل حاجة وأقول أني بعمل حاجة حرام أو حلال، هو ده مرض ولا دي حاجة دينية؟؟ أنا مبقتش فاهمة بجد الموضوع كل ما يروح كام ساعة في اليوم يرجع أقوى ومبقتش بصدق كلام أي حد!
أنا تعبت أرجوكم ساعدوني وريحوا قلبي
وقولوا لي أن لي علاج علشان أنا من ساعة أول وسواس جاء لي وأنا حاسة أني عمري ما هرجع زي زمان ثاني
23/9/2020
رد المستشار
الابنة الفاضلة "سارة" أهلا وسهلا بك على مجانين وشكرا على ثقتك، واختيارك خدمة استشارات مجانين بالموقع.
ليس واضحا ما إن كانت الوسوسة أو الوساوس هي ما بدأت به مشكلتك أم هو الاكتئاب الذي استمر لشهرين ثم انقشع تاركا "سارة" نهبا لمشاعر وأفكار وهمية الأشياء واحتمال عدم وجودها؟ أنت تقولين (مشكلتي بدأت تقريباً من السنة التي فاتت لما بدأت أحس بخنقة بدون أي سبب.....إلخ) فهل الوساوس التي كنت تدخلين على مجانين لتقرئي عنها كانت سابقة أم هي التالية لفترة الاكتئاب ؟؟
مسار عادي لاضطراب وسواس قهري وسواس يسلم لوسواس من افتراض وهمية الأشياء إلى الوسوسة بالشذوذ الجنسي إلى الوسوسة في العقيدة ثم إلى وسواس الموت ثم إلى وساوس وقهور الحرام والحلال وهي من وساوس التعمق في السؤال..... لكن هل كل هذا يا "سارة" حدث منذ السنة الماضية فقط ؟.... كان الله في عونك.
تحتاجين إلى علاج لاضطراب الوسواس القهري وهو موجود وأفضله هو المزج بين جرعة صغيرة من أي من عقاقير الم.ا.س.ا كما يختار الطبيب النفساني المعالج إضافة إلى برنامج علاج سلوكي معرفي متكامل بما في ذلك منع الانتكاس.
ومرة أخرى أهلا وسهلا بك دائما على موقع مجانين فتابعينا بالتطورات.
ويتبع>>>>> : وسواس قهري أم ماذا؟ وسواس قهري تعمقي م