رفض المدرسة : والبقية تأتي !

المدرسة بنسبة لي عذاب نفسي (بدون مبالغة!!)

السالفة مرة طويلة لكن بحاول أختصر اللي أقدر عليه
أنا شخص أكره المدرسة كره مهما شرحت وقلت وفعلت محد بيعرف كمية البغض لها في قلبي، أنا أحس بضيقة قوية جداً مجرد أسمع اسمها ودايم أحس بضيقة قوية مرة إذا كنت باكر بروح لها، أقعد أفكر نص يومي أفكر فيها وكيف بينتهي الوقت طبعاً هذا غصباً عني يعني شيء لا إرادي فيني غصب أفكر

المهم كره المدرسة بدأت من رابع ابتدائي جاءني شعور بالبغضاء لها لدرجة أكثر من الشيطان، وفصلت سنة ثم أبوي وداني عند شيوخ قرؤو علي مافيني شيء وثم رجعت لها سنة يوم رجعت أقسم لكم أني أول يوم حسيت أني دخلت الجحيم

ما أدري كيف مر اليوم ذلك ثم كملت إلى ثالث متوسط مع شوية معاناة صراحة نفسية طبعا بسببها ثم سنة ثالث متوسط اللي هي هذه الحين أدرسها مرة تعبت نفسيا بشكل مو طبيعي أضعاف السنوات اللي قبل صرت أشيل همها بشكل مو طبيعي وأنا آكل أفكر فيها وأنا في الحمام أفكر وأنا أكلم الناس أفكر فيها....... طبعاً السنة هذه ماتت أمي الله يرحمها وأثر علي صراحة موتها قبل 3 شهور تقريباً.....

المهم السنة هذه المرة متضايق وأغلب أيام الشهور هذه لا تخلو من الضيقة الشديدة والهم القوي وحاولت أقول لأبوي السالفة لكنه كان ينظر لي نظرة أني أبالغ في الموضوع بزيادة وكل مرة أحاول أني أقنعه أني ما أكذب ما يصدق ويزعجني على موضوع المدرسة وأنا تعبان نفسياً صراحة وقتها مالي خلق

والشيء الوحيد اللي يخليني أفرح أو أستأنس هو البلاي ستيشن لكن أبوي ما يخليني ألعب يقول : أنت تغيب بس عشان تلعب ويحاول يخرب علي كل ما لعبت وإذا أخوي لعب ما يقوله شيء أما أنا لا....... لكنه هذه الفترة ترك ذا الطبع

وحاولت أكلم أخصائية نفسية عن هذا الموضوع تقول : عجزت أفهم ليش أنت تكره المدرسة وموضوع أني أتحمل وأداوم ومع الوقت برووح هذا مستحيل أسويه لأني تقريباً جربت هذا الشيء وأنا ما أقدر أتحمل هذا الضغط صراحة وهو ما يروح أنا لي شهرين أو أكثر والإحساس ما راح

وإخواني يسألوني ليش تغيب كثير؟ ما أقدر أقولهم أني أكره المدرسة بسبب الضغوطات النفسية اللي تجيني منها لأنهم مستحيل يصدقوني وبيظنون أني أمزح أو أكبر الموضوع مثل أبوي وحاولت أكلم أختي عن موضوع المدرسة في البداية أخذت الموضوع جد بعدها فجأة صارت مثل أبوي تظن أني أبالغ وكل يوم أحاول أشرح لهم وقريب

سألت أخوي قولت أنت ما تشيل هم المدرسة يقول لا ثم بعدها سألته قريب قولت أنت لك نفس تداوم يقول مالي نفس لكن قليل أنا أحس أني شوي وأموت من كثر الضيقة وقبل كم سنة سألت إخواني في نهاية العطلة قولت تشيلون هم المدرسة؟؟ يقولون متحمسين لها

أنا أستغرب مرة أقول هذولي فيهم عقل ولا إيش؟ يعني هذه تقريبا باختصار سالفتي مع المدرسة برأيكم إيش أقول لأبوي وإخواني عجزت أقنعهم بس رجاء لا أحد يقول حاول تغصب نفسك أو تتحمل لأني ما أقدر هذه مرة مرة مرة قوية علي وأنا ما أقدر صراحة خلاص أنا أعلن استسلامي ضدها ما أقدر صراحة
4/11/2018

ثم بعد يومين أرسل يقول :
حالة عصبية قوية جدا؟ أو حالة من الشجاعة القوية جدا؟بحاول أختصر سريع كلامي
أنا ولد عمري 16 اسمي سلطان من السعودية
أنا عندي كره للمدرسة (مستحيل) أحد يفهم هذا الشعور وما أتوقع أحد جربه
شعور من العذاب النفسي المستمر.....

المهم قولت لا أبوي أمس أني ما راح أدرس ثاني مرة يعني بفصل وقولت أن لو تسوون إيش مستحيل أدرس ثاني مرة مو عشان أبين نفسي عصبي لا من جد كنت صادق وأنا صادق في نفسي يعني حتى تخيلت في عقلي أنه لو يقطعون يدي ماني براجع (من جد بدون مبالغة!) حتى أنا تعجبت من نفسي وإذا أحد قال لي بكرة بتادوم؟

أدخل في دوامة أحس نفسي نصف واعي ونصف نايم يعني كأن شيء يتحكم فيني ويخليني أتكلم بعصبية وأتصرف بعنف أنا بس حبيت أعرف هذه القوة ما أدري الشجاعة كيف جاءت وهل سبق رؤيتها وهل لها مسمى علمي؟
6/11/2018