الاكتئاب بعينه مع الخوف!

 مساء الخير يا مجانين
 
 أنا عندي دلوقت 24 سنة ومن وأنا عندي 12 سنة تقريبا أعاني من فقدان الطاقة وانعدام الرغبة بأي شيء... كنت أقضي وقتي كله في المذاكرة والحقيقة كنت متفوقة جدا ودخلت كلية عالية وتخرجت ورتبت على الدفعة كمان لكن كل ده كنت بعمله بقوة الدفع... من غير طاقة... من غير هدف... من غير إحساس... يعني أنا لم أكن مهتمة بالتفوق لكني كنت أذاكر كثيرا لأن المذاكرة هي الحاجة الوحيدة التي أعرف أعملها وأهرب فيها من فراغ حياتي..
 
 الأجازات كنت أقضيها بين النوم والمحادثات مع ناس عشوائيين على الإنترنت.. المهم أني عشت حياتي كلها كده لا أعمل أي حاجة حرفيا وطبعا ليس لي أصحاب... وكنت أصل في أوقات أني لا أقوم من السرير لمدة أسبوعين أو ثلاثة متواصلين وحتى أبسط الأشياء زي تسريح شعري أو غسل وجهي وأسناني لم أكن أقوم به إلا قليل جدا
 
 المهم من شهور قليلة وبعد ما لقيت نفسي مش قادرة أكمل في شغل قررت أشوف دكتور نفسي واتشخصت بـ pdd أو persistent depressive disorder أو اكتئاب مزمن
 طبعا بعد زعل وحسرة على حالي كتير قررت أكمل وبدأت أخذ الأدوية وبدأت أتحسن تحسن بسيط جدا
 لكن مشكلتي حاليا إني مش عارفة أعمل إيه بالتحسن ذا... أنا ما عندي أي تصور لشكل الحياة من غير اكتئاب لأني معشتوش ومعرفوش
 
 مش عارفة أمشي في أنهي اتجاه أو أعمل إيه.. بحاول أقلد الناس لكن مش عارفة كل اللي بيعملوه صعب جدا عليا
 كمان أنا عندي صفر أصحاب وعلاقتي بأهلي مش أفضل حاجة ومليش تجارب في أي حاجة... حاسة إني لسه مولودة امبارح، مش عارفة أتحرك حتى لما بقى عندي شوية طاقة صغيرين... مش عارفة أروح فين.. معنديش مرجع لأي حاجة
 الدكتور يقول لي أني لازم أخرج من البيت وابتدي أستكشف حاجات جديدة عشان أعرف أنا أحب إيه؟... لكن مش عارفة أنا خائفة من بره البيت ومعرفش حاجة بره البيت وحرفيا ممكن أتوه
 
 أنا مش عارفة لماذا أكتب هنا.. يمكن عايزة أحد يقول لي أبدأ من فين... أو يرشدني لأي بداية... حد يقول لي ما هو شكل الحياة الطبيعي. ما هو اللي المفروض أكون حساه أو بعمله... ويمكن مجرد عايزة أشارك اللي بمر بيه لأنه حقيقي ثقيل جدا عليّ لوحدي
 13/06/2025