المحتاجة لللنوم..
السلام عليكم، أنا وأخويا كنا بنام في اوضة واحدة هو على وأنا على سرير بس عملنا أوضة لي وأوضة له
بس أنا ساعات النوم مبعرفش أنام بليز ترد عليا.
1/05/2008
رد المستشار
أهلا بك؛ تصدقين أني مبسوطة قوي إن أنا اللي هرد عليك لأسباب كثيرة أولا، أنا أول مرة أكلم حد في سنك دة، وكمان عشان الموضوع اللي بتبعتي تسألي عنه وكمان اسمك أعجبني جدا ومش عارفة أنتي بتابعي الموقع بتاعنا ده من امتى وبتقري فيه إيه وعرفتيه ازاي والظاهر إن أنا اللي هسال وأنتي اللي هتردي عموما مستنية منك الإجابات على الأسئلة دي كلها...
نرجع بقى لمشكلتك وهي على فكرة مش مشكلة ده إنت بقيت متميزة بأن لك أوضه لوحدك هتخدي حريتك في أنك تنوري النور أو لاء هتخدي حريتك في أنك تغير هدومك براحتك لأنك كبرت لدوقتي شوية عن زمان وبقيتي بنوتة جميلة مش هينفع تغير قدام حد ولا كل شوية تطرديه بره؟
وكمان ممكن كدة تستقبلي صحاباتك براحتك في قوضتك لو اخوكي عاوز ينام مثلا في نفس الوقت أو محتاج حاجة ولو قعدنا نفكر في مميزات إن ليكي قوضه لوحدك مش هنخلص كلام..... لكن موضوع يجيلك نوم دي عاوزاكي تبقي متأكدة جدا انو هيروح بمرور الوقت وهتاخدي على قوضتك الجديدة وانك تنامي لوحدك فيها وممكن تنوري نور بسيط قوي قريب منها أو فيها وعاوزة أقولك إن فيه بنات كتير جدا يتمنوا إنهم ويبقى ليهم قوضة خاصة بيهم عشان ياخدوا راحتهم أو يعملوا فيها مكتبة صغيرة أو يعملوا فيها تدريبات رياضية براحتهم بس مش قادرين.
أقولك كمان على سر...... وأنا في سنك كنت بخاف في الأول أنام لوحدي في الأوضة بعد ما كنت بنام في نفس الأوضة مع اخويا إلهامي وبعد كدة اتعودت... آه صحيح هو اخوكي اسمه إيه؟
وبعدين بدأت أحافظ على الصلاة كويس وأقول قرآن بسيط قبل ما أنام أو اتوضى قبل ما أنام وبس خلاص ما بقاش فيه أي مشكله خالص اعملي أنتي كمان كده زيي.
والسلام ختام.
واقرئي أيضًا رد أ.د.مصطفى السعدني عليك:
فرقوا بينهم في المضاجع